Ил Түмэн мандаат уонна регламент хамыыһыйата кулун тутар 13 күнүгэр норуот дьокутаата Александр Иванов* тас дойдулар агеннарын реестригэр киллэриллибитинэн сибээстээн, боломуочуйатын болдьоҕун иннинэ тохтотор туһунан боппуруоһу көрүөҕэ.
«Ил Түмэн сокуонунан депутат боломуочуйатын болдьоҕун иннинэ тохтотор туһунан боппуруоһу көрөргө эбээһинэстээх. Кулун тутар 13 күнүгэр мандатнай уонна регламентнай хамыыһыйа мунньаҕа ананна, бэбиэскэтигэр Иванов* боппуруоһа киллэрилиннэ», — диэн Саха сирин Судаарыстыбаннай мунньаҕын мандатнай уонна регламентнай хамыыһыйатын бэрэссэдээтэлэ Игорь Григорьев иһитиннэрдэ.
Мандаат хамыыһыйатын мунньаҕын түмүгүнэн ыйыллыбыт боппуруос Ил Түмэн көрүүтүгэр киллэриллиэҕэ. Ил Түмэн VII ыҥырыытын 18-с уочараттаах пленарнай мунньаҕа кулун тутар 25-26 күннэригэр былааннанар.
Санатар буоллахха, олунньу 27 күнүгэр Арассыыйа Минюһа Иванову* тас дойдулар агеннарын реестригэр киллэрбитэ, бу Арассыыйа сокуонун быһыытынан депутатскай боломуочуйалары булгуччу тохтоторго тириэрдэр.
*Арассыыйа юстиция министиэристибэтинэн омук агенынан билиниллибит
