Ил Дархан Айсен Николаев ахсынньы 19 күнүгэр Ил Түмэҥҥэ туһаайыытын кэмигэр байыаннай сулууспалаахтар социальнай адаптацияларыгар үлэни күүһүрдэри эттэ. Көмө бары хайысханан баар буолуохтаах диэн соругу бырабыыталыстыбаҕа туруорда.
«Биһиги байыастарбыт кыайыы көтөллөөх дойдуларыгар төннүөхтэрэ — онно былаас уонна уопсастыба эҥкилээбэт соругу толоруохтаахпыт. Кинилэр эйэлээх олоххо төннөллөрүгэр көмөлөһүөхтээхпит. Хас биирдии буойун толору туруктаах буолуутун хааччыйыахтаахпыт. Үлэлээх буолуутугар, хамнастаах буолуутугар, баҕарар идэтин ыларыгар. Өрөспүүбүлүкэ бырабыыталыстыбатыгар, муниципальнай тэриллии баһылыктарыгар байыаннай сулууспалаахтар социальнай адаптацияларыгар үлэни күүһүрдэри соруйабын», – диэтэ Айсен Николаев.
