Бэҕэһээ өрөспүүбүлүкэтээҕи Медиа-кииҥҥэ Култуура сылын сүрүн тэрээһиннэрин ыытыыга, сырдатыыга анаммыт төгүрүк остуолга мустубут суруналыыстарга нуучча-саха, саха-нуучча тылынан саха норуотун култууратын тиэрминнэрин тылдьытын бэлэхтээтилэр. Тылдьыты СӨ Култууратын уонна духуобунай сайдыытын министиэристибэтин көҕүлээһининэн оҥорон таһаардылар, суруйда Саха парламент саайт.
«Ил Түмэн» Издательскай дьиэ генеральнай дириэктэрэ, сүрүн эрэдээктэрэ, «Ситим» медиа-бөлөх, «Кыым» хаһыат генеральнай дириэктэрэ Мария Христофорова маннык тылдьыт тоҕоостоох кэмҥэ тахсыбытын бэлиэтээтэ. Кини юридическэй тиэрминнэри сахалыы тылбаастыырга быраап тылдьытын таһаарбыттарын, онон тылдьыты оҥоруу бэрт сыралаах үлэттэн тахсарын этинэн-хаанынан билэрин туһунан аҕынна.
Култуура сылыгар Дьокуускай куоратынан муҥурдаммакка тыа сирин нэһилиэктэрин талба талааннаах, уран тарбахтаах, дэгэрэҥ куоластаах тумус туттар дьонун өрөспүүбүлүкэ таһымыгар таһааран, сырдатар үлэни ыытар наадалааҕын эттэ.
Былырыын Саха Сирин соҕуруу эҥээрин бырамыысыланнай улууһун тэбэр сүрэҕэр Нерюнгрига Олоҥхо ыһыаҕын үрдүк таһымҥа ыыппыттарын курдук быйыл Кэбээйигэ эрдэттэн бэлэмнэнэн, промо-тэрээһиннэри ыытар наадалааҕын иһитиннэрдэ.
Мария Николаевна култуура диэн тылы киэҥник көрөн, ырыаҕа-үҥкүүгэ эрэ охтубакка, олоҕу киэҥник хабан, чөл олох, уһун үйэлэнии, төрүт ас, тыл култуурата баар буолуохтааҕын, ону сайыннарыах тустаахпыт туһунан санаатын үллэһиннэ.
