Хотугулуу-Илиҥҥи федеральнай университет «Точка кипения» миэстэтигэр уруһуйдьут-ювелир Маргарита Зиминаны кытта төгүрүк остуол буолла. Кулун тутар 2 күнүгэр «Сокровищнице Якутии» былаһааккатыгар дойду араас регионнарын сибэккилэриттэн киэргэйбит быыстапката аһыллар. 27 оҥоһук ортотугар өрөспүүбүлүкэ биэс эндемигэ, ол иһигэр Саха сирин биир бэлиэтэ — сардаана сибэкки баар.
Тэрээһин кэмигэр ХИФУ физика-техническэй институтун күндү таастары уонна тимирдэри таҥастааһын технологиятын кафедрата ыалдьыттарга устудьуоннар үлэлэрин билиһиннэрдэ. Маргарита Зимина оҥоһуктары үрдүктүк сыаналаата уонна көрүүлээх буолууну сайыннарыы уонна ол кэмҥэ бэйэ интэриэһинэн истиили көрдөөһүн наадатын бэлиэтээтэ. «Сибэккини куруук сөбүлүүбүн. Айар үлэбэр айаным саҕаланыытыгар алтанынан элбэхтик эксперименнээбитим, онтум миэхэ дьоҕурбун арыйарбар суолбун тэллэ», — диэн эксперт кэпсээтэ.
“Историяны сөпкө ытыктааҥ, эһигини хайыы- үйэ ураты оҥорор национальнай колориткыт баар», — диэн Margarita Zimina хампаанньа генеральнай директора Андрей Зимин сүбэлээтэ. Саха лилията кинилэри өрө көтөҕөн, онон бэлэм оҥоһук кэнниттэн сардаана өссө икки варианын толкуйдаабыттарын кэпсээтэ.
Ону тэҥэ төгүрүк остуолга ХИФУ ФТИ доцена Лилия Сидорова, Дьокуускайдааҕы уус-уран училище директора Александра Неустроева, ХИФУ археология уонна этнография түмэлин отделын сэбиэдиссэйэ Мария Попова уонна уҥуоҕунан уһанар, СӨ норуодунай уус-уран оҥорууларын маастара Аэлита Боескорова тыл эттилэр.
