Чурапчы улууһун Хатылытын дьиэлэригэр гаас оттук холбонно. Бу күҥҥэ 60 дьиэ бу дьаһалынан хабылынна. Ол туһунан регион баһылыга Айсен Николаев телеграм-ханаалыгар суруйда.
«Биир сыл анараа өттүгэр үөрүүлээх быһыыга-майгыга гаас оттугу сэлиэнньэҕэ киллэрбиппит. Бүгүн 60 ыал холбонно. Барыта 160 дьиэ кыттар кыамталаах. Россия регионнарыгар гаас оттугу холбонуу сиэригэр-туомугар элбэх оҕолоох Геннадий уонна Марина Кривошапкиннар кытыннылар. Тэрээһин Петербурга ыытыллар гаас пуорумун былаһааккатыгар видеосибээс киэбинэн ыытылынна. Кривошапкиннар соторутааҕыта гаас оборудованиетын ылыыга өрөспүүбүлүкэтээҕи субсидияны туппуттар. Кинилэр дьиэлэригэр сылаас буолбутун эттилэр», — суруйда Айсен Николаев.
Хаартыска: Айсен Николаев телеграм-ханаала
Ил Дархан Хатылы олохтоохторугар гаас оттук дойду президенэ Владимир Путин биллэрбит социальнай бырагырааматынан, «Газпром» уонна «Сахатранснефтегаз» үлэлэринэн олоххо киирдэ.
