16 Атырдьах ыйа 16.08
  • 13°
  • $ 61,37
  • 62,51

Хатастар араас сылларга үлэлээбит бэтэринээрдэрин туһунан киэн тутта кэпсииллэр

Бүгүн бэтэринээр идэлээхтэр анал күннэрэ. Бу идэ биһиэхэ саха дьонугар – сүөһүлээх-сылгылаах норуокка — олус чугас, сылаас өйдөбүллээх. Хатас сирэ-уота, дьоно-сэргэтэ бэтэринээр идэлээх үтүөкэн үлэһит дьоннооҕо даҕаны, дьонноох даҕаны уонна баар да буолуохтара диэн эрэнэбит. Биһиги үлэ дьонунан киэн туттабыт.

Хатаска бэтэринээр идэлээхтэр үлэлэрин түмүгэр, устуоруйаҕа киирбит аймаҕаннаах, элбэх сүтүктээх бруцеллез, сэллик курдук сыстыганнаах ыарыылар суох буолбуттара. Санаан да көрдөххө, ама да ааспытын иһин, саҥа атахха туран кэҥээн-тэнийэн эрэр хаһаайыстыбаҕа улахан хоромньуну таһаарбыт ыарыыны суох гынаары сүөһүнү эһэн баран, ыарыы хаттаан турбатын туһугар үлүгэрдээх элбэх түбүгү көрөн, хаттаан төрөтөн-ууһатан, урукку ахсааны ситэрин ааһан, аһара барыы, бородууксуйаны ылыы (үүт да , эт өттүнэн) көрдөрүүлэрин үрдэтии төһөлөөх сыраттан тахсыбыта буолуой?!

Күн бүгүн биһиги киэн тутта ааттыыбыт – Решетниковтар династиялары – Михаил Николаевиһы, Людмила Михайловнаны, Клавдия Михайловнаны, Васса Васильевнаны, кэргэннии Иван, Татьяна Абрамовтары, кэргэннии Андрей, Федора Никифоровтары. Ону тэҥэ кэргэннии Евдокия Евсеевна, Михаил Гаврильевич Баишевтары, Николай Алексеевич, Ирина Семеновна Чиряевтары, Елена Афанасьевна, Василий Васильевич Мокрощуповтары, Ирина Илларионовна Баишеваны, Потапова Вера Андреевнаны, Аргунов Афанасий Васильевиһы, Мордовской Иван Васильевиһы, Чахова Людмила Михайловнаны, Попова Евдокия Семеновна, Соболева Мария Романовнаны, Оконешникова Фекланы, Алексеев Семен Систировиһы, Шелковникова Надежда Ивановнаны уо.д.а.

Бары да чулууттан чулуу ааттар, астык дьон.

Күн бүгүн кэргэннии Юрий Пантелеймонович, Татьяна Валерьевна Гуляевтар Хатас сиригэр-уотугар 2012 сылтан бу сулууспа үлэтин баһылаан-көһүлээн илдьэ сылдьаллар. Кэргэнниилэр бэтэринээрийэ эйгэтигэр 1993 сылга Дьокуускайдааҕы тыа хаһаайыстыбатын техникумун боруогун атыллыахтарыттан уонна ону бүтэрэн 1996 сылга диплом ылыахтарыттан ыла туппут илиилэрин араарбакка үлэлииллэр-хамсыыллар. Кэлин иккиэн үрдэтинэннэр, билигин үрдүк үөрэхтээх бэтэринээрдэр.

Юрий түбүктээх үлэтин быыһыгар уопсастыбаннай олоххо көхтөөхтүк кыттар – быыбар хамыыһыйатыгар үлэлиир. Сахабыт сирин киэҥ эйгэҕэ таһаарбыт тоҥ балык күрэҕэр Хатас аатыттан кыайыылаахтык кыттыталаабыта, «Поем, танцуем со звездами» диэн бырайыакка ыллаабыта, «Байанай» күрэҕэр уо.д.а. ситиһиилээхтик кыттар.

Аҕыйах сыллааҕыта эдэр сылгыны өлөр ыарыыттан быыһыыр эмтээһини оҥорон, эмиэ киэҥ нэлэмэн Сахабыт сиригэр элбэхтэ кэпсэммитэ, көстүбүтэ. Юрийдаах Татьянаны эйэҕэс-сайаҕас майгыларын, сатабылларын иһин Хатаска сүөһүлээх-астаах дьоммут бары да махтаналлар, сылаастык, сымнаҕастык саныыллар.

Ааптар: Наталья Руфова, Хатас

Следите за самым важным и интересным в Telegram-канале и WhatsApp-группе ЯСИА
2
0