Балаҕан ыйын 1 күнүгэр «Хатас» совхоз солбуллубат дириэктэрэ, РСФСР, ЯАССР норуотун хаһаайыстыбатын үтүөлээх үлэһитэ, «Полярная звезда» Саха сиринээҕи Үрдүкү орден кавалера Прасковья Федорова төрөөбүтэ 95 сылын туолла. Бу бэлиэ күҥҥэ анаан, Хатаска тыа музейын скверигэр боруонса бюст аһылынна.
Пааматынньыгы аһыы сиэригэр-туомугар Саха сирин тыатын хаһаайыстыбатын миниистирин солбуйааччы Николай Афанасьев, норуот депутата Иван Слепцов, Дьокуускай куорат баһылыгын солбуйааччы Владимир Аржаков кытыннылар.
Бюсту оҥоруу уонна туруоруу үлэтин НКО «Зеленай Север», Хатас агрооскуолатын коллектива, ООО «Прогресс» көмөтүнэн үбүлээтилэр. Пааматынньыгы биллиилээх скульптор Роман Басов оҥордо.
