Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников Өймөкөөн уонна Абый оройуоннарыгар халаан уутун содулун туоратыы хаамыытын туһунан иһитиннэрдэ. Бүгүҥҥү күҥҥэ 1577 киһиэхэ биир кэмнээх материальнай көмө уонна баайы-дуолу чөлүгэр түһэриигэ үп быһыытынан 40 мөлүйүөнтэн тахса солк. төлөннө. Билигин сайаапкалары ылыы түмүктэммитин үрдүнэн “Госуслуги” портал нөҥүө киирбит хаалбыт сайабылыанньалары ырытыы салҕанар.
Миэстэтигэр оройуон уонна судаарыстыбаннай структуралартан биригээдэлэр үлэлэрин салҕыыллар. Өймөкөөн оройуонугар тутууга наадалаах матырыйааллаах тиһэх таһаҕас массыыната ыытылынна. Абый оройуонугар Кэбэргэнэ сэлиэнньэтигэр олорор дьиэлэри өрөмүөннүүр матырыйааллар хайыы-үйэ тиэрдилиннилэр, оройуон бэйэтин күүһүнэн көхтөөх үлэни ыытар.
Ону тэҥэ ууга былдьаммыт оройуоннартан Дьокуускайга «Энергетик» лааҕырга сынньаммыт оҕолор үөрэх дьыла саҕаланыытыгар номнуо дьиэлэригэр төннөллөрө бэлиэтэнэр.
Өрөспүүбүлүкэ баһылыга Айсен Николаев ыйыытынан сорох нэһилиэнньэлээх пууннарга муниципалитеттар сайаапкаларыгар сөп түбэһиннэрэн оттук сезона саҕаланна.
«Былаас ситэриилээх органнара бары бэйэлэрин эбээһинэстэригэр төһө кыалларынан эппиэтинэстээхтик сыһыаннаһан, туруоруллубут соруктары толордулар дии саныыбын. Үлэ салҕанар — эмсэҕэлээбит оройуоннарга олох толору нуормаҕа киирэрин туһугар тугу барытын оҥоробут», — диэн бэлиэтээтэ Дмитрий Садовников.
