Саха сирин киин улуустарын олохтоохторо чаҕылхай күннээх «дьахтар сайыныгар» астына сырыттахтарына, өрөспүүбүлүкэ сорох улуустарыгар маҥнайгы хаар түһэр. Күнү-дьылы кэтээн көрөөччүлэр бу күннэргэ сорох сирдэринэн инчэҕэй хаар, ардах түһүө диэн билгэлээбиттэрэ, суруйда Саха сирэ саайт.
Балаҕан ыйын 16 күнүн сарсыардатыгар Үөһээ Бүлүү улууһун хотугулуу сытар Боотулуу, Көтөрдөөх, Сургуулук нэһилиэктэрин олохтоохторо социальнай ситиминэн маҥнайгы хаары хаартыскалаан, видеолаан ыыттылар. Бу нэһилиэк олохтоохторо халлаан сылаас, +2 кыраадыс, түүн син түспүт, билигин инчэҕэй хаар түһэ-түһэ ууллар, кыһыммыт кэлиэ өссө да эрдэ дэһэллэр. Бу эҥэр Өлөөнтөн чугас буолан, хаар эрдэ түһэр, кыһына тымныы буолар.
Күнү-дьылы кэтээн көрөр сулууспа үлэһиттэрэ бэлиэтииллэринэн, Саха сирин хотугулуу өттүгэр хаар эрдэ түһүүтэ – мэлдьи көстөр быһыы. Үгүс сиргэ маҥнайгы хаар балаҕан ыйыгар түһэр. Ол да буоллар, норуот синоптига Тускул этэринэн, тымныы күүтүллүбэт, күһүн уһуо, хаар түстэҕинэ да, арааһа, түргэнник ууллуоҕа.
