Томпо улууһун муниципальнай тэриллиилэригэр элбэх квартиралаах дьиэлэри өрөмүөннүүр үлэлэр хаһыс да сылын ыытыллаллар. Үбү араас программаларга кыттан булаллар.
Ол курдук, холобур, улуус киинин – Хаандыга бөһүөлэгин дьаһалтата элбэх квартиралаах дьиэлэргэ энергосбережение программатыгар кыттан ааспыт сыллаахха 18 мөл. 600 тыһ. солкуобайы ахсынньы ыйга ылбыта.
Билигин ол харчы суотугар үлэ ыытыллар. Ол курдук иккилии этээстээх элбэх квартиралаах мас дьиэлэри өрөмүөннүүр үлэлэри ыытарга туордааһыҥҥа 10-тан тахсалыы сайаапка киирбитэ. Үс тэрилтэ (иккитэ олохтоох, биирэ Дьокуускай куораттан) кыайыылааҕынан тахсыбыттара. Биригээдэлэр биэс дьиэни өрөмүөннүү сылдьаллар. Ол курдук дьиэ эркиннэрин ититэр матырыйаалынан бүрүйэн баран тас өртүлэриттэн тимир лиистэринэн саайдылар. Ити үлэлэр түмүктэригэр дьиэлэр тас көстүүлэрэ тупсарын таһынан эбии итийиэхтэрэ.
Михаил Алексеев, «Хаандыга б.» МТ баһылыга:
— Быйыл эмиэ ити үөһэ этиллибит программаҕа киирсэн өссө 14 мөл. солкуобайы ылар буоллубут. Ити харчынан өссө хас да дьиэни ититэр матырыйаалынан бүрүйүөхпүт. Подъездтага ааннарын уларытыахпыт уонна стеклопакет түннүктэри туруоруохпут. Подъездтарга уоту харыстыыр лаампалары салгыы туруоруохпут. Итинник үлэлэр түмүктэригэр үбү кэмчилээһин тахсарын ТСЖ-лар бэлиэтииллэр.
