Хаҥалас оройуонун дэлэгээссийэтэ, оройуон баһылыга Сергей Гребнев салайааччылаах, анал байыаннай дьайыы ыытыллар зонатыгар барда. Делегация састаабыгар нэһилиэктэр баһылыктара Виктор Константинов, Роман Савин, Александр Алексеев уонна Кэскил Багдарыын бааллар. Кинилэр СВО зонатыгар икки нэдиэлэ кэриҥэ сылдьыахтара. Ол туһунан оройуон дьаһалтатын пресс-сулууспата иһитиннэрэр.
Айан сүрүн сыала-соруга — байыаннай сулууспалаахтарга гуманитарнай көмөнү тиэрдии. Наадалаах оборудованиены, тэрили атыылаһыыга үбү Хаҥалас улууһун социальнай-экономическай сайдыытын пуондата хомуйда. Оройуон олохтоохторун уонна кэлэктииптэрин өйөөһүнүнэн, пуонда счетугар 2 621 209 солк. киирдэ. Делегация барар кэмигэр уопсай баланс 3 869 739 солкуобай, иннинээҕи хомууртан хаалбыт 1 548 530 солкуобай үбү эбэн туран. Хомуллубут үбүнэн куттал суох буолуутун уонна сибээһи хааччыйарга наадалаах табаардар атыылаһылыннылар, олор истэригэр оптоволокно уонна «Булат» антидрон. Стратегическай суолталаах тэриллэри таһынан Хаҥалас улууһун олохтоохторо дьиэ аһын эмиэ ураты кыһамньылаахтык бэлэмнээтилэр. Нэһилиэктэргэ дьахталлар байыаннайдарга ыытарга, төрөөбүт дьиэлэрин сылааһын иҥэрэн, собо ыһаарылаатылар, бэрэски буһардылар.
Хаҥалас улууһун олохтоохторуттан байыаннай сулууспалаахтарга өйөбүл акцията хас да төгүл ыытылынна. Ахсынньы 18 күнүгэр «Мы с вами!» анал байыаннай дьайыыга кыттар байыаннай сулууспалаахтары өйүүргэ тэриллибитэ. Ахсынньы бүтүүтүгэр СВО зонатыгар 3,5 тонна гуманитарнай таһаҕас ыытыллыбыта. Быйыл тохсунньуга авиация тырааныспарынан 2 тонна 200 кг тиэрдилиннэ.
«Хаҥалас улууһун бары олохтоохторугар, үлэ кэлэктииптэригэр СВО зонатыгар баар оҕолорбутун биир санаанан өйүүргүтүн көрдөрбүккүтүгэр дириҥник махтанабыт. Эһиги көҥүл өттүнэн көмөҕүт — уолаттарбыт куттала суох буолууларын хааччыйыыга, туруоруммут соруктарын толорууга сыаната суох кылаат. Дьон-сэргэ биһиги байыаннай сулууспалаахтарбыт туһугар ис сүрэхтэн кыһалларын, уопсай дьыалаҕа кылааттарын киллэрэргэ баҕалаахтарын көрөбүт. Бу айан — биһиги күүспүт дьиҥнээх өйөбүлү оҥорорун, биир дойдулаахтарбыт бойобуой санааларын көтөҕөр кыахтааҕын илэ билэбит”, — диэн оройуон баһылыгын социальнай боппуруостарга солбуйааччы Николай Степанов бэлиэтээтэ.
