Хаҥалас улууһун оскуолаларыгар ОРВИ уонна грипп ыарыыта улаатан иһэринэн сибээстээн, карантин дьаһаллара киирдэ. Мохсоҕоллоох орто оскуолатыгар 19 кылаас уонна Покровскайдааҕы 1 № — дээх оскуола биир кылааһа харантыыҥҥа ыытылыннылар диэн Роспотребнадзор Хаҥалас улууһугар территориальнай салаатын салайааччыта Афанасий Алексеев иһитиннэрдэ.
«Маны таһынан Өктөмнөөҕү уопсай үөрэх орто оскуолатыгар үс оскуола иннинээҕи бөлөх үлэтэ быстах кэмҥэ тохтотулунна. Ол иитиллээччилэр ортолоругар ыарыы эпидемиологическай боруогун куоһарыынан сибээстээх.
Төрөппүттэргэ оҕолор доруобуйаларын туругун кэтээн көрөр, ыарыы бастакы бэлиэлэригэр оҕону дьиэҕэ хаалларан бырааска көрдөрөрү сүбэлииллэр. Профилактика миэрэтин тутуһуҥ: илиини сууна сылдьыҥ, дьиэ салгынын ыраастааҥ, дьон элбэхтик мустар сириттэн туора сылдьыҥ», — санитарнай быраас этиитин Хаҥалас улууһун дьаһалтатын пресс-сулууспата тириэртэ.
