Ааспыт нэдиэлэҕэ, балаҕан ыйын 16 күнүгэр, Судаарыстыбаннай Дуума VIII ыҥырыылаах мунньаҕын тохсус сиэссийэтэ ыытылынна. Бастакы пленарнай мунньахха парламент бэрэссэдээтэлэ Вячеслав Володин тыл эттэ, суруйда Саха парламент саайт.
Ил Түмэҥҥэ күһүҥҥү сиэссийэ саҕаланара бу кэллэ. Норуот талбыт дьокутааттара үлэлэрин номнуо торумнууллар. Бу туһунан кылгастык норуот дьокутааттарыттан санааларын үллэстэллэригэр көрдөстүбүт.
Норуот дьокутаата, өрөспүүбүлүкэтээҕи харах балыыһатын кылаабынай бырааһа Иван Луцкан иһитиннэрбитинэн, Ил Түмэн күһүҥҥү сиэссийэтигэр сүрүн боппуруоһунан 2026 уонна былааннанар 2027-2028 сыллардааҕы бүддьүөтү көрүү буолуо.
— Бүддьүөтү торумнуурга социальнай хайысхаҕа болҕомто намырыа суоҕа. Бу дойдубут уонна “Биир Ньыгыл Арассыыйа” баартыйа үлэтин сүрүн салаата буолар. Өрөспүүбүлүкэбит хас биирдии олохтооҕун иннигэр социальнай эбэһээтилистибэлэр туолуохтаахтарын туһунан Ил Дархан, баартыйа эрэгийиэннээҕи салаатын сэкирэтээрэ Айсен Николаев этэр.
Балаҕан ыйын 1 күнүттэн оскуолаларга “Оскуола мэдиссиинэтэ” үлэтин саҕалаата. Маныаха тустаах сокуоҥҥа уларытыы ылыллыбыта, мэхэниисимнэр үлэлииллэр, олоххо киириитэ хонтуруолга турар. Бу бырайыак эмиэ Ил Дархан сорудаҕынан ыытыллар.
Эминэн босхо хааччылыы боппуруоһун быһаарыыга бырабыыталыстыбаны кытары кэпсэтиилэр ыытыллаллар. Быйыл бу салааҕа көрүллэр үбү үрдэтээһиҥҥэ Ил Дархан сорудаҕа киирэн турар. Бу ый бүтүүтэ Аллараа Бэстээххэ чэпчэтиилээх эминэн хааччыллыы боппуруостарын ырытыыга, сүбэлэһиигэ, үлэни торумнуурга доруобуйа харыстабылын кэмитиэтэ көһө сылдьар мунньаҕы ыытыахпыт. Онон босхо эминэн хааччылыы боппуруоһа сөптөөхтүк быһаарыллыа диэн сыаналыыбыт.
Дьону долгутар атын сытыы боппуруостары таарыйдахха, олох-дьаһах хомунаалынай хаһаайыстыба салаатыгар бүддьүөттэн субсидияны тэҥнээн биэрии бара турар. Өссө сааскы сиэссийэ кэмигэр бырабыыталыстыба уонна Ил Түмэн быһаарсыылары ылыммыппыт. Ол курдук, электрическэй уокка үрдэтиллибит тарыыптар нэһилиэнньэҕэ буолбакка, улахан кыамталаах бырамыысыланнай тэрилтэлэргэ туһаныллыа.
Оттон олох-дьаһах хомунаалынай хаһаайыстыбатын эйгэтигэр реформалары этэр буоллахха, хочуолунайдары гаас оттукка көһөрүү сытыытык ырытыллар, кэпсэтиллэр. Маныаха өссө да үлэ барыаҕа.
Ааптар: Галина МАТВЕЕВА
