П.Д.Аввакумов аатынан киин библиотекаҕа Аҕа дойду Улуу сэриитин үлэҕэ фронун кыттылааҕа, комсомольскай, партийнай, советскай үлэһит, Горнай, Кэбээйи оройуоннарын Бочуоттаах олохтооҕо Прокопий Егорович Агеев «Төрөөбүт дойдуга таптал, норуокка анаммыт олох» олоҕун, үлэтин сырдатар кинигэ сүрэхтэниитэ буолла.
Төрөөбүт дойдутун сайдыытын, кэскиллээх инникитин туһугар олоҕун анаабыт, Горнай улууһун уһулуччулаах салайааччыта, норуотун ааттатар чулуу киһибит Прокопий Егорович Агеев буолар.
Кинигэни хомуйан оҥордулар Любовь Агеева — Прокопий Агеев улахан кыыһа, Российскай Федерация уопсай үөрэхтээһинин Бочуотаах үлэһитэ, СӨ үөрэҕириитин туйгуна, «Гражданскай килбиэн» бэлиэ хаһаайына, Тимур Агеев — Прокопий Агеев улахан сиэнэ, Горнайдааҕы ветеринарнай управление ветеринарнай тэрээһиннэрин ыытар салаатын сэбиэдиссэйэ, Мария Агеева Прокопий Агеев сиэн кийиитэ, Горнайдааҕы ветеринарнай управление лабораториятын сэбиэдиссэйэ.
Кинигэ туһунан библиографическай ырытыыны Горнайдааҕы кииннэммит библиотечнай ситим библиограба Анастасия Заровняева оҥордо. Кинигэни бэчээккэ РФ Суруналыыстарын сойууһун чилиэнэ Василий Алексеев бэлэмнээтэ, эрээдэктэрдээтэ. Василий Ильич П.Е.Агеевы кытта алтыспытын, кинигэни таһаарыыга хайдах үлэ ыытыллыбытын туһунан кэпсээтэ.
Прокопий Егорович Агеев төрөөбүт улууһа сайдарыгар үрдүк таһаарыылаахтык үлэлээн-хамнаан, ситиһиилээхтик салайан, дьон-сэргэ олоҕо тупсарыгар, араас элбэх өрүттээх үлэни ыытан, өрөспүүбүлүкэ, улуус общественнай-политическай, социальнай-экономическай, культурнай сайдыытыгар сүдү кылаатын киллэрсибитэ. Кинигэ сүрэхтэниитигэр Алгыс Стручков Горнай улууһун баһылыгын бастакы солбуйааччы, Алексей Аргунов Бэрдьигэстээх нэһилиэгин баһылыга, П.Е.Агеев төрөөбүт нэһилиэгиттэн баһылык Иван Петров кыттыыны ыллылар.
Кинигэ сүрэхтэниитигэр СӨ норуодунай cуруйааччыта Николай Лугинов күндү ыалдьыт буолла. П.Е. Агеев Кэбээйигэ үлэлиир сылларыгар Николай Алексеевич дьонун кытта доҕордоһор, табаарыстаһар этэ. Н.А.Лугинов истиҥ-иһирэх ахтыы оҥордо.
Прокопий Егорович Агеев 1965-1971 сылларга Кэбээйи оройуонун сэбиэтин тэрийэр кэмитиэтин бэрэссэдээтэлинэн таһаарыылаахтык үлэлээн, ыарахан сылларга улуус чэлгийэ сайдарыгар улахан төһүү күүс буолбута, сайдыы суолугар киллэрбитэ. Кэбээйи улууһуттан Анна Ионова Кэбээйи улуустааҕы библиотека директора кыттан, улуус баһылыгын Иван Левин аатыттан эҕэрдэ суругу туттарда, П.Е. Агеев Кэбээйигэ үлэлээбит сылларын сырдатта.
Кинигэ баай ис хоһоонноох ыстатыйалартан турар. Үөрүүлээх тэрээһиҥҥэ аймаҕа Марина Андреева — СӨ нэһилиэнньэтин социальнай көмүскэлин үтүөлээх үлэһитэ, Улуустааҕы Ытык сүбэ бэрэссэдээтэлэ, Горнай улууһун Бочуоттаах олохтооҕо, Владимир Парфенов СӨ үөрэҕириитин үтүөлээх үлэһитэ, суруналыыс, төрөөбүт кыраайы чинчийээччи, бииргэ үлэлээбит СӨ тыатын хаһаайыстыбатын үтүөлээх үлэһитэ, үлэ уонна спорт ветерана, Варвара Сметанина улуустааҕы үөрэх управлениетын начальнига истиҥник санаатылар, ахтыылары оҥордулар.
П.Е.Агеев быраата Гаврил Осипов кэргэнинээн Полиналыын истиҥник санаан аастылар, “Сайыҥҥы Сиинэҕэ” ырыаны бэлэхтээтилэр.
Прокопий Егорович уонна кини тапталлаах кэргэнэ, Российскай Федерация үтүөлээх учуутала, Горнай улууһун Бочуоттаах олохтооҕо Мотрена Ивановна Винокурова — улууспут киэн туттар, сис ыаллара буолан дириҥ убаастабылынан туһаналлара, киһи быһыытынан бастыҥнара, кэрэлэрэ, олох суолугар, билии-көрүү киэҥ далайыгар кэнчээри ыччаты сирдээһиннэрэ биир дойдулаахтарын үтүмэн көлүөнэ дьонугар үтүө холобур буолар. Үс оҕолоохтор: Любовь Прокопьевна учуутал идэтин баһылаан, Бэрдьигэстээх улуустааҕы гимназиятыгар директорынан, Вера Прокопьевна Өрт, Надежда Прокопьевна Кэптин учаастактааҕы балыыһаларыгар быраастарынан эҥкилэ суох үлэлээн, төрөөбүт улуустарын сайдыытыгар улахан өҥөлөөхтөр, кинилэр оҕолоро, сиэннэрэ ытык-мааны дьоннорун олохторун сиэрдээхтик салгыыллар.
Тэрээһин түмүгэр Любовь Агеева аймахтарын аатыттан кинигэҕэ үлэлээбит, өйөөбүт дьоҥҥо махтал суруктары, мустубут дьоҥҥо аҕаларын, эһээлэрин П.Е. Агеев туһунан кинигэлэрин бэлэх уунна.
Үтүө киһи аата үс үйэ тухары ааттанар диэн өс хоһоонугар этиллэринии, киэн туттар салайааччыбыт, Горнай уонна Кэбээйи улуустарын Бочуоттаах олохтооҕо Агеев Прокопий Егорович аата-суола, дойдутун, норуотун туһугар айбыт-туппут, үлэлээбит олоҕо кэнчээри ыччакка суолдьут сулус буолан, билиигэ-көрүүгэ, сайдыыга күннэтэ салайсар.
Ааптар: Айталина Санникова, П.Д.Аввакумов аатынан инновационнай үлэҕэ библиотекара
