Горнай улууһугар «50+ оскуолата» уопсастыбаннай түмсүү күһүҥҥү-кыһыҥҥы кэмнэргэ аҕам саастаах дьон олоҕун-дьаһаҕын хайдах сэргэхситэргэ былааннаах үлэни ыытар.
Оскуола үлэтин 5 сылын уоппуттаах библиотекарь Эмма Петрова таһаарыылаахтык салайар. Ол курдук, ырыаҕа, өйү-санааны бигэ туруктуурга, доруобуйаны көрүнүүгэ, о.д.а. араас туһалаах тиэмэҕэ анаан куруһуоктары, көрсүһүүлэри, маастар кылаастары, анал лиэксийэлэри былааннаабыттар.
«Правовое поле пенсионера” кулууп үлэлиир. Аҕам саастах дьон социальнай өйөбүлүнэн туһаныыларын күүһүрдэр тустаах сокуоннары билиһиннэрэллэр. Сэрии, тыыл уонна үлэ бэтэрээннэригэр көрүллэр социальнай мэктиэлэр, чэпчэтиилэр тустарынан специалистар бэсидэлэри оҥороллор.
Улуус баһылыгын бастакы солбуйааччы Алгыс Стручков кулууп чилиэннэрин кыһалҕалаах боппуруостарыгар толору хоруйу биэрдэ. Холобура олбуор иһиттэн сибээс кабелларын таска таһаарыыга сурукта биэрин, үлэлэһиэхпит диэн иһитиннэрдэ. Эргэ уот остуолбаларын көтүрүүгэ Бэрдьигэстээх РЭС тэрилтэтэ былааннах үлэни ыытарын кэпсээтэ. Гаастааһыҥҥа хаһыллыбыт траншеялары сөптөөхтүк көмөн дьон, сүөһү, транспорт куттала суох сылдьарыгар подрядчиктары кытары үлэлэһэллэрин эттэ. Хаарбах дьиэттэн көһөрүү программатын сырдатта.
«Бу маннык көрсүһүүлэр биһиги бэтэрээннэрбит уонна пенсионердарбыт кэлэр кэскиллэрэ туруктаах буолуутун хааччыйарга көдьүүстээх буоларын көрдөрдө. Саҥа киирбит кыһалҕалаах боппуруостары быһаарыыга тустаах специалистары кытта үлэ барар. Онон сэҥээрбиттэр 89241689191 төлөпүөҥҥэ эрийэн сурутуохтарын сөп», — диэн СИА-ҕа суруйда киин библиотека үлэһитэ Айталина Санникова.
