Бүлүү улууһун депутаттарын Сэбиэтин бэрэссэдээтэлэ Гаврил Корякин Төрүт Сокуоҥҥа бэйэни салайыныыга сыһыаннаах уларытыылары киллэрии түмүгэр баһылыктар, депутаттар куорпустарын эппиэтинэстэрэ өссө үрдүөҕүн, хонтуруол күүһүрүөҕүн, салайар хаадырдары кытта үлэ тупсуоҕун тоһоҕолоон бэлиэтээтэ.
— Бастатан, Саха Өрөспүүбүлүкэтин Төрүт Сокуонугар уларытыылары киллэрии кинини саҥардыынан, федеральнай сокуоннарга сөп түбэһиннэриинэн ыытылларын бэлиэтиэм этэ.
Бэйэни салайыныыга киирсэр уларытыыларга тохтоотоххо, мин көрөрбүнэн, саҥа 33 ФС бэйэни салайыныы ис тутулугар, ис хоһоонугар биллэр-көстөр уларытыылары киллэрдэ.
Ил Дархан Айсен Николаев эппитинэн, өрөспүүбүлүкэҕэ олохтоох бэйэни салайыныы икки таһыма хаалыахтаах. Кини бырайыагын кытта сөпсөһөбүн – бүгүҥҥү күҥҥэ икки таһым хаалыахтаах. Олохтоох бэйэни салайыныыга саҥа сокуон бырайыагынан депутаттар куорпустарын боломуочуйата күүһүрэн биэрэрэ, үлэтэ-хамнаһа, итини сэргэ, уопсастыбыннай хамсааһыннар үлэлэрэ тупсара көстөр.
33 ФС урукку курдук нэһилиэк, оройуон боломуочуйалара диэн араарбат. Саха Өрөспүүбүлүкэтигэр икки таһымнаах бэйэни салайыныы хааларынан, боломучуйалары аттаран туруорууну болҕомтоҕо ылыахха.
131 ФС мөлтөх өрүтүнэн боломуочуйалары толорууга үбүлээһинэ суоҕар сытара. Саҥа сокуонтан боломуочуйалары толорууга төһө үп көрүллэрин, бэриллэрин күүтэбит, ол эбэтэр сүрүн боппуруос боломуочуйа көрүллүүтүгэр уонна үбүлээһинигэр сытар.
Ити икки өрүт кыаллар түгэнигэр, бэйэни салайыныыга сыал-сорук туолуо диэн көрөбүн.
Төрүт Сокуоҥҥа уларытыылары киллэрии түмүгэр баһылыктар, депутаттар куорпустарын эппиэтинэстэрэ өссө үрдүөҕэ, хонтуруол күүһүрүөҕэ уонна хаадырдары аттаран туруоруу тупсуо.
Ааптар: Николай Куприянов, Олох суола хаһыат
