Ньурба оройуонугар 2 № — дээх оскуолаҕа бастакы кылаас үөрэнээччитэ эчэйиини ылла. Оскуола 100 тыһыынча солкуобайы моральнай компенсация быһыытынан төлүөҕэ. Оройуоннааҕы борокуратуура оҕо төбөтүгэр эчэйиитинэн бэрэбиэркэ ыытта.
Бэрэбиэркэ быһаарбытынан, оскуолаҕа физкультура уруогун кэмигэр оҕо мууска халтырыйан, төбөтүнэн сиргэ охсуллан түстэ. Борокуратуура эчэйии биричиинэтинэн оҕолор оскуолаҕа сылдьалларыгар куттала суох усулуобуйаны сөптөөхтүк хааччыйыы барбатаҕын быһаарда.
Ол түмүгэр борокуратуура эмсэҕэлээбит оҕоҕо моральнай хоромньуну толуйар туһунан суукка дьыаланы ыытар. Суут борокуратуура ирдэбилин толорон, оскуоланы 100 тыһыынча солкуобайы төлүүргэ эбээһинэстиир.
