«Уһук Илиҥҥэ айыллыбыт: айар дьоҕуртан экэниэмикэҕэ диэри» диэн креативнай индустрия норуоттар икки ардыларынааҕы II пуорум былаһааккаларыгар эдэр урбаанньыттар питчинг-сиэссийэҕэ идиэйэлэрин, бырайыактарын үбүлээччилэргэ уонна эспиэртэргэ тиэрдиэхтэрэ. Бииргэ үлэлииргэ сөбүлэҥҥэ илии баттаһыахтара, оччотугар креативнай салаа экэнэмиичэскэй көдьүүһэ өссө улаатыаҕа, суруйда Саха Парламент саайт.
«Пуорум чэрчитинэн «Креативнай эйгэ эрэгийиэни сайыннарыы үнүстүрүмүөнэ» диэн үөрэх бырагырааматын финала ыытыллыаҕа, биһиги маны Уһук Илини сайыннарыы корпорациятын кытта кыттыһан тэрийэбит.
Бырагыраама Уһук Илин креативнай экэниэмикэни сайыннарарга туһуланар улахан сыалы-соругу учуоттаан туран оҥоһулунна. Арассыыйа Уһук Илини сайыннарыыга министиэристибэтин хайысхатынан үбүлэнэн күн бүгүн Уһук Илин тутулла турар креативнай кластердары салайар дьону бэлэмниэхтээхпит.
АГИКИ үрдүк үөрэх кыһата айар үлэлээх дьону түмэр кииннэри салайар дьон саҥа бэрэстэбиитэллэрин бэлэмнииргэ үлэлэһэр», — диэн билиһиннэрдэ Аартыкатааҕы култуура уонна ускуустуба үнүстүүтүн риэктэрэ Саргылаана Игнатьева.
Айар индустриялар II норуоттар икки ардыларынааҕы пуорумнара Уһук Илин эрэгийиэн биир бэлиэ улахан тэрээһининэн буолуоҕа. Креативнай пуоруму Уһук Илин уонна Арктика сайдыытын министиэристибэтэ, Уһук Илин сайдыытын корпорацията, СӨ Бырабыыталыстыбата уонна Социальнай көҕүлээһиннэри сайыннарар пуонда тэрийэллэр.
Онон пуорум аан дойду таһымнаах улахан түһүлгэ айар дьоҕурдаах дьону уонна үбүлээччилэри түмүөҕэ. Сабыылаах былаһааккаттан тахсан, куорат бэстибээлигэр кубулуйуоҕа. Дьокуускай болуоссаттарыгар кэнсиэртэр, дьаарбаҥкалар, гастрономическай бэстибээл ыытыллыаҕа, ыалдьыттарга киинэ көрдөрүөхтэрэ.
Уһук Илин биир улахан бэлиэ тэрээһин эрэгийиэн култуурунай нэһилиэстибэтэ, аныгы креативнай технологията саҥа кэрдиискэ тахсан, экэниэмикэ сайдарыгар, дьон олоҕун таһыма тупсарыгар дьоһун кылааты киллэриэҕэ. Креативнай индустрия пуорума бүтүн эрэгийиэн имиджэ тупсарыгар, саха талааннаах дьоно аар саарга аатыралларыгар эрэллээх далаһа буолуоҕа.
Эрэдээксийэ хаартыската.
