Дьокуускай полициятыгар куорат олохтооҕо дьахтар уопсайа 47 тыһ солкуобайдаах тус баайа уоруллубутун туһунан сайабылыанньа киллэрэр. Холуобунай ирдэбит сотрудниктара буруйу оҥорооччуну туталлар — эрдэ сууттана сылдьыбыт 37 саастаах эр киһи буолар. Ол туһунан ИДьМ Саха сиринээҕи салаатын пресс-сулууспата суруйда.
Дьахтар эр киһини кытта барга билсэр. Дьиэтигэр ыҥырар. Онно арыгы иһэллэр. Дьахтар утуйбутун кэннэ эр киһи кини кыһыл көмүс ытарҕатын, кулгаахха кэтэн истэр тэрилин уонна 22 тыһ солк онлайн-баантан устан ылар. Ол кэннэ сүтэр.
Уорбут малын атыылаабыт, харчытын тус сыалыгар туттубут.
Холуобунай дьыала «Уоруу» ыстатыйатынан тэриллэр. Эр киһи 5 сылга диэри көҥүлэ быһыллыан сөп.
