Федерация Сэбиэтин тыа хаһаайыстыбатын уонна аһылык бэлиитикэтигэр, айылҕаны туһаныыга кэмитиэтин бэрэссэдээтэлин солбуйааччы Егор Борисов бу күннэргэ Саха Сиригэр үлэлээтэ, суруйда Саха парламент саайт.
Чурапчыга «Агротехнологическай тиһиккэ үөрэх быраактыкатын уонна сокуоннары тупсарыы: билим, үөрэхтээһин уонна оҥорон таһаарар үлэ сомоҕолоһуута» диэн мунньаҕы салайан ыытта. Мунньахха Агрооскуолалар өрөспүүбүлүкэтээҕи сойуустарын салайааччы Феодосия Габышева, тыа хаһаайыстыбатын уонна ас-үөл бэлиитикэтин миниистирин солбуйааччы Сахяна Павлова, араас улуустартан агрооскуолалар дириэктэрдэрэ итиэннэ Арассыыйа Агрооскуолаларын ассоциациятын салайааччы Ольга Илларионова, «Просвещение» аахсыйалаах уопсастыбаттан гендириэктэри солбуйааччы Анастасия Зырянова уонна Алексей Благинин, Борис Соловьев, «Народное образование» сурунаал сүрүн эрэдээктэрэ Елена Шишмакова кытыннылар. Кинилэр ««Технологическое обеспечение продовольственной безопасности» национальнай бырайыак чэрчитинэн оҥоһуллубут «АПК каадырдара» бырайыагынан, идэҕэ туһаайан үөрэтии хайысхата дойдуга саҥа ылыллан эрэрин быһыытынан, Саха Сиригэр оскуолаттан саҕаламмыт агротехнологическай үөрэхтээһин тиһигин билсэ кэлбиттэр.
Агрооскуолалар үлэлэрин уопутун, агрокылаастары тэрийии, кэҥэтии, уопсайынан агротехнологическай үөрэхтээһин тиһигин хайдах сайыннарар итиэннэ ону ситиһэргэ туох өйөбүл наадатын туһунан киэҥ кэпсэтии таҕыста.
Мунньахха сенатор Егор Борисов маннык эттэ:
— Бэрэсидьиэн Владимир Путин каадырдары үүннэрии бэлиитикэтин олох саҥалыы туруорда. Билигин национальнай бырайыактарынан тыа сирин, тыа хаһаайыстыбатын сайыннарыыга, ол иһигэр, каадырдары бэлэмнээһиҥҥэ олус табыгастаах бырагыраамалар бааллар. Каадырдары биһиги бэйэбит үүннэриэхтээхпит, дьиэ кэргэнтэн, оскуолаттан саҕалаан. Аҕам саастаах көлүөнэҕэ ытыктабыллаах сыһыаннаах, норуотун төрүт үгэстэрин, култууратын билэр, сыаналыыр, дойдутугар бэриниилээх, патриот дьону иитэн таһаарыахтаахпыт. Болҕомтобутун бу боппуруоска ууруохтаахпыт.
Агрооскуолалары бүтэрэр оҕолор салгыы тыа хаһаайыстыбатын үөрэҕин кыһаларыгар киирэллэрин эрэ эккирэтиспэккэ, бастатан туран, кинилэр тыа сирин үлэтин-хамнаһын билэр-сатыыр, кыайар-хотор, дойдубут инники сайдыытын түстүүр дьоһун дьон буола улааталларын ситиһиэхтээхпит.
Иккиһинэн, урукку үгэһи сөргүтэн, оскуолаларга үлэнэн иитиини киллэриэххэ наада. Маны былаас уорганнарыгар тиэрдэн, тус бэйэбит холобурбутунан саҕалыахтаахпыт. Ол кэнниттэн оҕолор төрөөбүт дойдулара, улуустара, тыа хаһаайыстыбата сайдарын туһугар бэйэлэрэ баҕаран туран аграрнай хайысхалаах үөрэх кыһаларыгар киирэллэрин ситиһиэхтээхпит. Дьэ бу эһиги соруккут, — диэтэ.
Тыа хаһаайыстыбатын сайыннарыыга, иитэр-үөрэтэр эйгэҕэ, каадыры бэлэмнээһиҥҥэ таһаарыылаах үлэлэрин сыаналаан, АГАТУ учуонайдарыгар, бастыҥ үлэлээх агрооскуолаларга, учууталларга, производственнай үөрэхтээһин маастардарыгар Федерация Сэбиэтин Махтал суруктарын туттартаата.
