20 От ыйа 20.07
  • 19°
  • $ 88,02
  • 96,04

Егор Борисов: Эдэр фермердэр тыа сирин кэлимсэ сайыннарыы иһин эппиэтинэһи ылыныахтаахтар

11:49, 05 мая 2016
Текст:
Читайте нас на
Яндекс Новости
ЯДВ

Оҥорон таһаарыы көрдөрүүтүн үрдэтии, аныгы технологиялары туһаныы, уопсайынан тыа сирин кэлимсэ сайыннарыы соруктарын Егор Борисов эдэр фермердэр иннилэригэр туруорда.


«Тыа хаһаайыстыбатын сайыннарыы иһин бэйэҕэ эппиэтинэһи ылыныы – бу уталыппакка быһаарыллыахтаах сүрүн сыалбыт-сорукпут. Маны олоххо киллэрэргэ элбэх кыах баар. Гран иһин өрөспүүбүлүкэтээҕи куонкуруска кыайыы – бу хайысхаҕа дьоһун хардыы», — диэтэ Е.Борисов.

1,5 мөл.солк. суумалаах граннары Саха сирин 28 улууһуттан 234 фермердэр ыллылар. Ыам ыйын 4 күнүгэр кинилэргэ грант сертификаттарын үөрүүлээх быһыыга-майгыга туттардылар.

Ил Дархан Саха сирин тыатын хаһаайыстыбатын сайыннарыыга элбэх үп-харчы көрүллэрин ойуччу тутан эттэ. «Экономикаҕа төһө да ыарахаттар баалларын иһин, тыа хаһаайыстыбатыгар көрүллэр көмө кыччаабат», —диэтэ Егор Афанасьевич.

Мунньах кэмигэр кини государство үбүн-харчытын сөптөөхтүк туһаныы иһин фермердэр эппиэтинэһи сүгэллэрин санатта. Хомойуох иһин, ити үбүнэн-харчынан массыына, дьиэ атыылаһыыта, сүөһүнү көрбөккө-харайбакка иэдээннээх быһыы-майгы тахсара суох буолбатаҕар кини тохтоото. Уһук Илиҥҥэ гектар сири босхо биэрии сокуона күүһүгэр киирэн эрэринэн, балаҕан ыйыгар диэри тыа хаһаайыстыбатыгар анаммыт сири-уоту докумуонунан ситэрии оҥоһуллуохтааҕын ойуччу тутан эттэ.

Гран иһин куонкуруска кыайан 1,5 мөл.солк. суумалаах граннары ылбыт дьон туһунан этэр буоллахха, Үөһээ Дьааҥы улууһуттан бааһынай хаһаайыстыба салайааччыта Андрей Винокуров эти переработкалыыр бырайыага государство үбүнэн-харчытынан өйөннө. Бүлүү улууһуттан Владимир Филиппов 225 төбөҕө анаммыт хотону тутары былаанныыр. Чурапчыттан Данил Павлов оҕуруот аһын үүннэриигэ 6 гектар сири арендаҕа ылбыт. Кэлин ити сирин улаатыннаран сүөһү, сылгы тутар баҕалаах. Горнайтан Луиза Васильева хаһаайыстыбатыгар 30-тан тахса төбө сүөһүлээх.

Бу саҕалааһыннары өрөспүүбүлүкэ баһылыга өйөөтө. Кини фермердэргэ туһаайан аныгы технологияны, наука ситиһиилэрин көдьүүстээхтик туһаналларыгар ыҥырда. Тыа хаһаайыстыбатын, ас-үөл политикатын министиэристибэтэ фермердэргэ сүбэлиир-амалыыр үлэни күүһүрдэригэр сорудахтаата. «Өйөбүл механизма өйдөнүмтүө уонна дьэҥкэ буолуохтаах», — диэтэ Егор Афанасьевич. Ону таһынан кини тыа хаһаайыстыбатыгар бүгүн оҥоһулла сылдьар 2030 стратегияҕа ураты улахан болҕомто уурулларын эттэ.

Следите за самым важным и интересным в Telegram-канале и WhatsApp-группе ЯСИА