Үөһээ Бүлүүтээҕи олоҥхо дьиэтигэр «Байанай», «Уолан» бөлөх солистара Ньургун Николаев сырдык кэриэһигэр «Көҥүл Саха» тыыннаах дорҕоон түһүлгэтэ бэҕэһээ тэрилиннэ, суруйда «Үөһээ Бүлүү» хаһыат. Бастакы бэстибээлгэ саха-рок легендата Александр Ильин — Чолбон Сааска ыалдьыттаата.
Бастакы ыытыллар бэстибээлгэ Үөһээ Бүлүүттэн, ыаллыы сытар Ньурба, Сунтаар улуустарыттан, Мэҥэ Хаҥаластан, Дьокуускайтан, ыраах Орто Халыматтан ааттаах-суоллаах уонна саҥа саҕалааччы бөлөхтөр кыттыыны ыллылар.
Тыыннаах дорҕоон түһүлгэтигэр «Байанай», «Уолан» бөлөхтөр репертуардарыттан элбэх ырыа ылланна, ону тэҥэ авторскай ырыалар дуораhыйдылар. «Көҥүл Саха» ыалдьытынан саха-рок легендата Александр Ильин — Чолбон Сааска буолла. Кини үрдүк сыанаҕа тахсан Ньургун Николаев туһунан истиҥник ахтан-санаан ааста. Ону таһынан үөһээ бүлүүлэр киэн тутта ааттыыр ырыаһыттарбыт — Артур Байанаев, Николай Ильин, Николай Малычехоров, Александр Томскай, Юрий Васильев — Дьураай аатырбыт ырыаларын бэлэхтээтилэр. Ону таһынан Ньургун Николаев быраата Айаал Николаев охсор-тэбэр инструменнарга оонньоото.
Үөһээ Бүлүүгэ ыытыллыбыт бастакы бэстибээлгэ «Көҥүл Саха» тыыннаах дорҕооно истиҥник дьүрүhүйдэ, уратытык наскыйда, иһийэн турбут чуумпуну үрэйдэ.
