Эбээн Бытантай улууһун дэлэгээссийэтин кытта көрсөрүгэр бырабыыталыстыба бэрэссэдээтэлэ Евгений Чекин оройуон Арктика сайдыытыгар оруолун бэлиэтээтэ. Евгений Чекин национальнай улуус саамай эдэр тэриллиинэн уонна уустук суоллаах-иистээх улууһунан буоларын эттэ.
Кини этиитин улуус баһылыга Иван Горохов бигэргэттэ. “Биһиги улууспут 2014 сылтан нэһилиэнньэ ахсаана улааппыт уонна олохтоохтор көһөн барыылара аҕыйаабыт Арктика үс улууһуттан биирдэстэрэ”, — диэн бэлиэтээтэ кини.
2017 с. түмүгүнэн улууска таба ахсаана 14,5 тыһ. Оройуоҥҥа сылгы иитиитэ сайдар.
“Баатаҕай Алыытыгар “Киин” хочуолунайы тутуу көрүллүбүтэ. 12,8 МВт кыамталаах хочуолунай 2019 с. үлэҕэ киириэхтээх. Киин хочуолунайы тутуу “СӨ ДЬКХ” ГУП Инвестиционнай бырагырааматыгар киирбитэ”, — диэтэ СӨ ОДьКХ уонна энергетика миниистирэ Данил Саввинов.
Салгыы 220 миэстэлээх оскуоланы, Баатаҕай Алыытыгар 160 миэстэлээх оҕо саадын уонна Дьарҕаалаахха 70 миэстэлээх оскуола-саады тутуу боппуруостарын көрдүлэр. Быйыл Саха сирин госбүддьүөтүттэн Баатаҕай Алыытыгар оскуоланы тутууга 42 мөл солк. үбүлээтилэр. Уһуйааннары тутууну 2020 сыл кэнниттэн көрүөхтэрэ. Эбээн бытантайдар нефтебазалара суоҕун туһунан этиннилэр. Онуоха Евгений Чекин Саха сиригэр нэһилиэнньэ олоҕун хааччыйыыга госкэмитиэккэ улуус дьаһалтатын кытта “Саханефтегазсбыт” филиалын арыйыыны киллэрэн туран, кыһалҕаны быһааралларыгар сорудахтаата.
Айаал Яковлев,
Мария Васильева түһэриитэ.
