Саха сирин бастыҥ многоборецтара Уус Алдан улууһун Бороҕон нэһилиэгэр олунньу 7-8 күннэригэр хомуллуохтара, Дыгын Оонньууларын сэттэ төгүллээх кыайыылааҕа Иван Белолюбскай аатынан чемпион Кубогар киирсиэхтэрэ. Ыһыах сүрүн турнирыгар үс путевка уонна дьоһуннаах бириистэр бааллара биллэр, суруйда ЯСИА.
Чемпион кубога Дыгын Оонньууларыгар иккис сүүмэрдиир түһүмэх буолар. Кыайыылаах уонна икки призер путевкалары ылыахтара. Атын кыттааччылар бэйэлэрин рейтиннэригэр наадалаах бааллары эбиэхтэрэ. Санатан эттэххэ, үс сүүмэрдиир түһүмэх кэнниттэн, алта многоборец сайыҥҥы күрэхтэһиилэргэ чопчу түмүк табылыыссанан көрүллэн талыллыахтара.
Бороҕоҥҥо саамай титуллаах спортсменнар барыахтара. Ол курдук түһүлгэҕэ дьон сөбүлүүр спортсмена, 2024 с. Дыгын Оонньууларын кыайыылааҕа, Горнай улууһуттан Дьулустан Ноговицын тахсыаҕа. Онон Таас Боотур кэтэһиилээх төннүүтэ буолар. Киниэхэ конкуренцияны атын чөмпүйүөн — Алексей Уваровскай оҥоруоҕа. Билиҥҥитэ Кэбээйи улууһуттан сылдьар үс спортсментан кини эрэ путевката суох.
Чемпион Кубогар бу турнир хас да төгүллээх кыайыылааҕа уонна 2023 сыллааҕы Дыгын Оонньууларын кыайыылааҕа Вячеслав Дьяконов Нам улууһуттан кыттыбата биллэр. Ньурбаттан Николай Обоев эмиэ бу старды аһарыа. Борис Сдвижков, Николай Матаннанов, Яков Дмитриев уонна Артем Дьяконов эмиэ кыттыбаттар, кинилэри Үс Хатыҥҥа көрүөхпүт.
Сунтаар улууһуттан Манчаары Оонньууларыгар национальнай многоборьеҕа муҥутуур кыайыылааҕа Тимофей Большаков кэлиэҕэ.
Үөһээ Бүлүүттэн Владимир Шологонов бастыҥын көрдөрөргө кыһаллыаҕа. Кини бастакы сүүмэрдиир турнирга хомолтолоох төрдүс миэстэни ылан, путевката суох хаалбыта. Бэйэтин кыттыытын Томпо улууһуттан Аммаҕа буолбут мас-рестлиҥҥэ норуоттар ардыларынааҕы турнир кыайыылааҕа Ариан Мярин бигэргэттэ.
Муома оройуонуттан Алексей Ефимов эмиэ кыттарын эттэ. Былырыын Кубокка хапсаҕайга уонна тааһы көтөҕүүгэ бастаабыта, ону тэҥэ Дыгын Оонньууларыгар аан бастаан киирсибитэ.
Олохтоох спорду таптааччылар биир дойдулаахтара Илья Карамзин туһугар “ыалдьыахтарын” сөп. Бастакы сүүмэрдиир түһүмэххэ кини уон күүстээх иһигэр киирбитэ уонна үчүгэй рейтини ылбыта. Дьокуускайтан Уус Алдан улууһуттан төрүттээх, мас-рестлиҥҥэ аан дойду чемпиона Семен Ануфриев кыттар.
Ону сэргэ уопуттаах Алексей Созонов, Александр Пшенников, Павел Друзьянов, Айсен Семенов, Петр Прудецкай, Алексей Соколов уо.д. а. кэлэллэрэ сабаҕаланар.
Эдэрдэртэн Мэҥэ Хаҥалас улууһуттан Руслан Слепцовка болҕомто ууруллуохтаах. 2006 сыллааҕы эдэр спортсмен, төһө да күүстээх конкуренция баарын иһин, Дьокуускайга бастакы сүүмэрдиир турнирга бэһис миэстэни ылбыта. Эмиэ путевка иһин былырыын Дыгын Оонньууларыгар уопут ылбыт өрөспүүбүлүкэ киин куоратын бэрэстэбиитэлэ Иван Степанов иккистээн киирсиэҕэ.
Чемпион Кубогын кыайыылааҕа бириис быһыытынан 300 тыһыынча солкуобайы ылыаҕа. Иккис миэстэҕэ 150 тыһыынча көрүллүбүт. Боруонса призерга убаһаны туттарыахтара. Маны таһынан, спорт биирдиилээн көрүҥнэригэр бастыҥнар 15 тыһыынча солкуобайы, иккис миэстэлэргэ уоннуу тыһыынчаны, үһүс миэстэлэргэ биэстии тыһыынчаны туттарыахтара.
Кыттааччылар үгэс быһыытынан национальнай ыстаныыга, тутум эргииргэ, мас-рестлиҥҥэ, ох саанан ытыыга, 400 миэтэрэҕэ сүүрүүгэ, хапсаҕайга уонна тааһы тардыыга күүстэрин холонуохтара.
