Сиһилии манна аах.
Национальнай күрэхтэһии кэлэр сезона балайда элбэх саҥа сулустары, ааттаах спортсменнары төнүннэриэ, ону тэҥэ күрэхтэһии үрдүк хатыһыылаах киирсиини эрэннэрэр. Быйыл кыһын Дыгын Оонньууларыгар кыттар быраап иһин сүүмэрдиир турнирдарга аан дойду чемпионнара, ону тэҥэ Манчаары Оонньууларын муҥутуур кыайыылаахтара тургутуһуохтара,диэн ЯСИА иһитиннэрэр.
Дыгын Оонньууларыгар сүүмэрдээһин быраабылата
Билиҥҥитэ Дыгын Оонньууларыгар квалификация турнирдарын ыытыы киэбэ быһаарылла илик. Саҥа сезоҥҥа сүүмэрдээһини ыытыы быраабылатыттан үгүс биллиилээх күрэхтэһээччи кыттара тутулуктаныаҕа. Сорохторо эчэйиилээх, онон үс квалификация турнира, ону тэҥэ Үс Хатыҥҥа оонньууларга бэйэтигэр кинилэргэ уустук буолуо.
Санатар буоллахха, ааспыт сезоҥҥа спортсменнар үс күрэхтэһиигэ баал ылыахтаахтар диэн сүүмэрдээһин рейтинин тутуспуттара. Ол түмүгэр 16 бастыҥ көрдөрүүлээх Дыгын Оонньууларыгар путевка ылбыта. Онуоха Таатта улууһуттан Николай Матаннанов икки сүүмэрдээһиҥҥэ кыттыбыта, үһүскэ эчэйбитэ. Ол гынан баран, үрдүк рейтиннээх буолан, путевка ситиспитэ. Ол аата икки күрэхтэһии түмүгүнэн эмиэ талыллыахха сөбүн дакаастаабыта.
Оттон ол быраабылалар киириэхтэрин иннинэ талыы туспа турнирдарынан ыытыллара. Хас биирдиилэригэр 3-4 призер тута оонньуулар финальнай чаастарыгар кыттааччылар буолаллара. Сотору кэминэн тэрийээччилэр быһаарыахтаахтар — рейтиннээх үс түһүмэхтээх сүүмэрдээһин быраабылатын хаалларыахтаахтар эбэтэр атын саҥаны олоххо киллэриэхтээхтэр.
