Өймөкөөнтөн Дугуйдан Винокуров төрөппүттэрэ Екатерина, Семён Винокуровтар уус алданнар үрүҥ көмүстэн ат толору киэргэлин көрөн, сөҕөн-махтайан аастылар.
Уус Алдан улууһун уран тарбахтаахтара Аммаҕа ыытыллар Олоҥхо ыһыаҕар 6 киилэ көмүстэн киэргэтиллибит ат симэҕин дьон көрүүтүгэр таһаардылар.
Бу олус сиэдэрэй толору ат симэҕин үрүҥ көмүһүнэн оҥоһууларын бүтүннүү көмүс маастара Прокопий Колодезников оҥордо, кини ыҥыырын, иҥэһэтин И.П. Готовцев аатынан Тандатааҕы историко-архитектурнай музейыгар харалла сытар ат симэҕэр олоҕуран, оһуордаан-мандардаан оҥорбутун көрөөччү эрэ биһирээтэ, Дүпсүннээҕи кыраайы үөрэтэр музей экспоната буолан турар Раиса Левчикова атын симэҕэр олоҕуран чаппарааҕын, кычымнарын, лэпсэтин, бэрэмэдэй сабыытын Екатерина Бочкарева тиктэ, бэрэмэдэйи Елена Слепцова, бас быатын, көнтөһүн, тэһиинин, холун быптын, бототун Татьяна Дегтярева, Марфа Васильевалаах өрөн оҥордулар.
Алексей Федотов улууска баһылыктаан олорор кэмигэр, кини сакааһынан ат симэҕин үлэтэ 2022 сыллаахха саҕаламмыта. Салгыы быйыл улуустааҕы культура управлениета үбүн көрөн, бу үлэ түмүктэнэн, Аммаҕа ыытыллар Олоҥхо ыһыаҕар дьон көрүүтүгэр таһаардылар.
Бу ат симэҕин ыҥыырыгар 2,5 киилэ, чаппарааҕар кычымнарыгар, бэрэмэдэйигэр, лэпсэтигэр 3,5 киилэ, барыта 6 киилэ үрүҥ көмүһүнэн киэргэтилиннэ.
Манна даҕатан эттэххэ, өрөспүүбүлүкэҕэ биллэр сылгыһыт, Өймөкөөнтөн төрүттээх экстремал айанньыт Дугуйдан Винокуров аҕата Семён Винокуров биир дойдулаахтарбыт үлэлэрин олус сэргээтэ.
