2025 сыл алтынньы 1 күнүттэн гражданнар сорох категориялара биэнсийэлэрин төлөбүрдэрин улаатыннаран ылыахтара. Бу туһунан «Прайм» агентствоҕа Россия бырабыыталыстыбатын иһинэн үлэлиир үп университетын доцена Игорь Балынин кэпсээтэ.
Бастатан туран, үрдэтии 2025 сыл балаҕан ыйыгар 80 сааһын туолбут биэнсийэлээхтэри таарыйыа. Кинилэргэ страховой биэнсийэ 10 221,70 солк.улаатыаҕа, ол иһигэр 8 907,70 солк. болдьохтоох бигэргэтиллибит төлөбүр уонна 1 314 солк. көрөр иһин эбии төлөбүр киириэҕэ.
Холобур, балаҕан ыйыгар биэнсийэлээх 39 878,93 солк.ылбыт буоллаҕына, алтынньыттан биэнсийэтэ 50 100,63 солк. тэҥнэһиэ, ол аата 25,63% үрдээһин.
Биэнсийэлээхтэргэ эбэтэр кинилэр аймахтарыгар элбэтиллибит биэнсийэни ылыыга сайабылыанньа суруллубат. Тоҕо диэтэххэ, Россия Социальнай пуондата бары наадалаах информацияны тутан олорор.
Ону таһынан алтынньыга Оборуона министиэристибэтэ, ИДЬМ, ФСБ, ФСИН уонна да атын судаарыстыбаннай былаас органнарын курдук биэдэмистибэлэр нөҥүө төлөбүр ылааччыларга биэнсийэ 7,6% индексацияланара күүтүллэр. Бу үрдэтии эмиэ сайабылыанньата суох оҥоһуллуо, диэн эксперт бэлиэтээтэ.
