Интэрниэт ситимигэр аҕыс ыйдаах оҕоҕо быһыы оҥорбуттарын кэннэ атаҕа иһэн, көҕөрөн, онтон ириҥэрэн тахсыбытын туһунан иһитиннэрии тарҕаммыт. Билиҥҥи туругунан СӨ доруобуйа харыстабылын министиэристибэтэ бу балаһыанньаны хонтуруолга ылбыт, НВК Саха телеграм-ханаал суруйар.
«Быһыы кэнниттэн оҕо тириитигэр инфекция киирэн ириҥэрбит. Билигин М.Е. Николаев аатынан I-кы №-дээх өрөспүүбүлүкэтээҕи медицинэ киинигэр тустаах эмтэниини ааһар. Маннык ыарыһахтары эмтииргэ бары усулуобуйа, эмп-том баар. Ийэтин кытта күннэтэ кэпсэтэллэр, оҕо туругунан быһаараллар», — диэн министиэристибэ пресс-сулууспата иһитиннэрэр.
Оҕо эмсэҕэлээбит төрүөтэ инфекцияттан буолара чопчуламмытын кэннэ поликлиникаҕа бэрэбиэркэни саҕалаабыттар. Ол түмүгүнэн СӨ Доруобуйа харыстабылын министиэристибэтэ тустаах быһаарыыны ылыаҕа.
