Дьиикэй вандализм уочараттаах түбэлтэтэ Дьокуускайга буолла, ол туһунан куорат баһылыга Евгений Григорьев иһитиннэрдэ. Талое күөл кытылыгар биллибэт дьон ыскамыайканы алдьатан ууга бырахтылар. Билигин төттөрү миэстэтигэр туруорулунна, оттон вандалларга полицияҕа сайабылыанньа сурулунна.
«Өскөтүн бу быһылааны түбэһэн көрбүт буоллаххытына, мин ВКонтакте тус ситиммэрр «личкаҕа» суруйаргытыгар көрдөһөбүн», — диэн куорат олохтоохторугар туһаайан эттэ мэр.
Григорьев этэринэн, Дьокуускайга вандализм дьайыытыттан үксүн уулусса фонардара, ыскамыайкалара уонна оптуобус тохтобуллара эмсэҕэлииллэр. Кинилэри чөлүгэр түһэриигэ куорат бюджетыттан улахан үп ороскуоттанар, диэн мэр олохтоохтору итинник түбэлтэлэри бииргэ тохтоторго ыҥырда.
Урут Дьокуускайга куорат араас оройуоннарыгар хас да сылаас тохтобул алдьаммыта. Быйыл сайын оптуобус тохтобулун үс эр киһи алдьаппыта биллибитэ.
