Ааспыт бырааһынньыктааҕы өрөбүллэргэ оптуобус иһиттэн сибэккини атыылааһыҥҥа улахан кэһии тахсыбатах. Маннык бобуу Дьокуускайга аан бастаан үлэлээтэ. Бу туһунан кулун тутар 10 күнүгэр бүтүн куорат мунньаҕар иһитиннэрдилэр.
«Киллэриллибит хааччахтааһын сүрүн сыала-соруга — көҥүллээх сибэкки бизнеһин өйөөһүн, ону тэҥэ сибэкки атыылааччылар маршрутнай оптуобустарын наймылаһыыларын бобуу. Үс хонук иһигэр улахан кэһиилэр көстүбэтилэр. Оптуобустар маршруттан тахсыылара тахсыбата», — диэн мэрияҕа иһитиннэрдилэр.
Дакылааты истэн баран, Дьокуускай баһылыга Евгений Григорьев сибэкки бизнеһин бэрэстэбиитэллэрин кытта кэпсэтиини олохтуурга сорудахтаата, ити эйгэҕэ куруук дьарыктанар урбаанньыттар атыыны-эргиэни тупсарыыга эбии дьаһаллар тустарынан бэйэлэрин санааларын этиэхтэрин сөп.
Санатан эттэххэ, кулун тутар 8 күнүн иннинэ уопсастыбаннай тырааныспартан сибэкки атыытын хааччахтыыр туһунан быһаарыыны Дьокуускай былааһа куорат олохтоохторун ыҥырыыларыгар олоҕуран ылыммыта. Олохтоохтор оптуобустар маршруттарыттан тахсалларын сөбүлээбэттэр, оттон көҥүллээх предпринимателлэр суобаһа суох конкуренция үлэни атахтыырын этэллэр.
