«Табаһыттар съездтэрэ – салаа сайдыытыгар баар боппуруостары быһаарсыыга саамай сөптөөх былаһаакка буолар, уопут атастаһыыта, холбоһуктаах быһаарыылары ылыныы, инникилээх хайысхалары сүрүннээһин. Бүгүн, олох олус түргэн тэтиминэн барар кэмигэр, үгэскэ кубулуйбут салаалары харыстааһын уонна сайыннарыы баар буолуохтаах», – диэтэ Кирилл Бычков.
Хаартыска: Саргын Скрябин/ЯСИА
Кини Саха сиригэр табаны иитиигэ ураты болҕомто уурулларын эттэ. Хаһаайыстыбалар материальнай-техническай баазаларын бөҕөргөтүүгэ, бородууксуйаны оҥорон таһаарыыга, эдэр исписэлиистэри өйүүргэ, табаһыт олоҕун-дьаһаҕын тупсарыыга бырагыраамалар үлэлэрин туһунан эттэ.
«Съездкэ тас дойдуттан ыалдьыттар кыттыыны ылаллар. Саха сиригэр баар элбэх сыллаах таба иитиитигэр уопуту кинилэргэ тириэрдэбит. Оттон кэллиэгэлэрбит таба хаһаайыстыбаларын бэрэстэбиитэллэригэр сыаннайы, суолталааҕы утары уунуохтара дии саныыбын», – диэтэ бэрэссэдээтэл.
Хаартыска: Саргын Скрябин/ЯСИА
«Бу нэдиэлэ устата элбэх тэрээһин ыытыллыаҕа. Төгүрүк остуоллар, семинардар, куонкурустар, спорт оонньуулара, мунньахтар, бу барыта уопут атастаһыытыгар, саҥа идеялар үөскүүллэригэр ураты платформа буолар», – диэтэ кини.
Съездкэ Кытайтан ыалдьыттар бааллар. Олугуя Эвенке (КНР) куорат уокуругун быраабы туһаныыга биир кэлим административнай бюротун хапытаана Дай Гуанюнь табаны иитиигэ Саха сирин кытта бииргэ үлэлииллэригэр махтанна.
«Уһун айаны айаннаан, биир санаалаахтарбытын кытта көрсөрбүтүттэн үөрэбит. Саха сиригэр бу салааҕа улахан болҕомто уурулларыгар махтанабыт. Салгыы бииргэ үлэлииргэ бэлэммит, ол иһигэр туризм сайдыытыгар», – диэтэ Дай Гуанюнь.
Резолюцияҕа киирбит этиилэри манна ааҕыҥ.
Санаттахха, кулун тутар 18 — 20 күннэригэр Дьокуускайга табаһыттар IV Съездтэрэ буола турар. 19 оройуонтан 250 делегат баар. Россия атын регионнарыттан уонна Кытай, Монголия бэрэстэбиитэллэрэ тэрээһиннэргэ кытталлар.
