«Саха сылгытын киэҥ араҥаҕа таһаарар сыалтан маннык киин Дьокуускайга баар буолуутун туһунан бары биир санааҕа кэллибит. Саха норуотун култууратын биир төрүтэ буолара этилиннэ. Киин сүрүнэ ат туризмын бизнеһэ буолуон сөп. Онно үлэлииргэ бэлэмнээх предпринимателлэр бааллар. Киин тутуллуон сөптөөх сиригэр история миэстэлэрэ, саханы төрүттээбит Эллэйи кытта сибээстээх пааматынньыктар, айылҕа кэрэ эбийиэктэрэ бааллар», — Telegram-ханаалыгар куорат баһылыга Евгений Григорьев суруйда.
Атын хайысхатынан сылгы иитэр пиэрмэнэн агротуризмы сайыннарыы буолуон сөп. Туристар биэ ыаһыныттан саҕалаан, кымыһы оҥоруу технологияларын билэллэригэр туһуламмыт.
«Манна эбии сылгы музейа. Идеяны Дугуйдаан Винокуров өрө тутар, манна сөптөөх сувенирдар, кымыс дегустацията уонна атыыта, иппотерапия, атынан айанныыр оскуола, маастар-кылаастар уонна да атыттар үлэлиэхтэрин сөп», — диэтэ салайааччы.
Мунньахха тыа хаһаайыстыбатын миниистирэ Артем Александров кыттыыны ылла.
