«Биир Ньыгыл Арассыыйа» баартыйа норуодунай бырагырааматынан дойду үрдүнэн саҥа балыыһалар тутуллаллар. Сотору кэминэн өрөспүүбүлүкэ киин куоратыгар Гагаринскай уокурукка сууккаҕа 600 киһини көрөр 2 №-дээх поликлиника аһыллыаҕа, Саха парламент саайта.
Биэс этээстээх балыыһаҕа улахан дьону, оҕолору көрөр поликлиника уонна дьахтар консультацията аһыллыаҕа. Ол туһунан Ил Түмэн дьокутаата, Дьокуускай куоракка баар өрөспүүбүлүкэтээҕи офтальмологическай клиническай балыыһа кылаабынай бырааһа Иван Луцкан Телеграм-ханаалыгар иһитиннэрэр.
Билигин аэропорт эргин олорор дьон хас да балыыһаҕа сылдьан көрдөрүнэллэр, хас да сиринэн сылдьан быраастары эккирэтэр табыгаһа суоҕун бэлиэтииллэр. Үгүс дьон МРТ кабинет хаһан аһылларын күүтэллэр.
Иван Луцкан эбийиэк 90 тахса бырыһыана тутуллан, ис өрөмүөн бүтэн, эркини кырааскалаабыттарын туһунан этэр. Куоракка кэлбит улахан мэдиссиинискэй тиэхиньикэни, ыарахан оборудованиены таҥан туруораллара эрэ хаалла.
Саҥа поликлиника SMART форматынан үлэлиэҕэ, быраастар киэҥ-куоҥ хоско олорон ыарыһахтары көрүөхтэрэ, оҕо салаатыгар оонньуур былаһаакка оҥоһуллуоҕа. Балыыһа баазатыгар Суһал көмө ыстаансыйата үлэлиэҕэ.
Саха Сиригэр доруобуйа харыстабылын бастакы сүһүөҕэр бу биир саамай улахан, аныгы олох ирдэбилигэр толору эппиэттиир, экспертнэй кылаастаах МРТ, КТ томографтаах, сыыппаранан үлэлиир УЗИ-лаах, рентген, маммографическай, эндоскопическай оборудованиеалаах поликлиника буолуоҕа.
Булгуччулаах медиссиинискэй страхование ОМС бырагырааматынан олохтоох нэһилиэнньэни босхо көрүөхтэрэ, эмтиэхтэрэ. Балыыһа судаарыстыбаннай-чааһынай партнерство чэрчитинэн тутуллар, бырайыак үбүлээччитэ «ВИС» бөлөх, кини эбийиэк бырайыагын оҥорууттан саҕалаан, балыыһаны мэдиссиинискэй оборудованиенан хааччыйыахтаах.
Хаартыска Иван Луцкан Телеграм-ханаалыттан.
