Дьокуускайга киин болуоссакка Саҥа дьыллааҕы салют буолбат диэн куорат дьаһалтата иһитиннэрдэ. Куорат олохтоохторо, чааһынай дьон бэйэлэрэ аналлаах сирдэргэ фейерверк ытыахтарын сөп, суруйда «Саха сирэ» сайт.
Быйыл Арассыыйа атын куораттарыгар эмиэ маннык быһаарыыны ылыммыттар. Саха сиригэр быйыл Саҥа дьыллааҕы корпоративтары уонна маассабай бырааһынньыктары ыытымаҥ диэн сүбэлээбиттэрэ. Холобур, Сунтаар улууһугар эмиэ маннык быһаарыыны ылыммыттара. Ол эрээри, оҕолорго Саҥа дьыллааҕы бырааһынньык ханнык баҕарар көрүҥэ бобуллубат.
Куоракка ханнык сирдэргэ фейерверктэри ытыахха сөбүй?
Теплай, Сэргэлээх, Үрүҥ Күөл, Солдатское, Билибин, Щорс, Сайсары күөллэргэ, Кыайыы болуоссатыгар, 202 түөлбэҕэ өрүс кытылыгар, «Чолбон» бассейн аттынааҕы былаһааккаҕа, ПТУ-16 аттынааҕы күөлгэ, Мерзлотка түөлбэтигэр, ДЮСШ №5, «Новинка», «Поярков», «Хозмаркет» маҕаһыыннар аттынааҕы былаһааккаларга, Комсомольскай болуоссакка, ЯГИТИ скверигэр, Күөх хонууга, о.д.а. маассабайдык ытар көҥүллэнэр.
