Дьокуускайга анал байыаннай дьайыы (СВО) түмэлин 2025 сылга «Россия — моя история» пааркаҕа арыйар сорук турар, ол туһунан ТАСС-ка комплекс дириэктэрэ Дмитрий Соловьев иһитиннэрдэ.
«Улахан саала иккис мэндиэмэнигэр СВО түмэлин арыйар былааннаахпыт, уопсай иэнэ 160 кв. м. Онно анаан билигин тэрээһин үлэлэр бараллар. 2024 сылга Саха сирин бырабыыталыстыбата бу сыалга анаан саҕалааһыҥҥа үп көрбүтэ, билигин биһиги матырыйаалын атыылаһабыт», — диэтэ Соловьев.
Дириэктэр бэлиэтээбитинэн, паарка пуондата трофейдарынан, СВО буола турар сириттэн малынан-салынан куруук хаҥаан иһэр. 2023 сылга Россия Геройа, Сунтаар улууһуттан төрүттээх, анал байыаннай дьайыыга сырдык тыына быстыбыт Дмитрий Егоров тутта сылдьыбыт тэрилин история пааркатыгар үйэ тухары харайыыга туттарбыттара.
«2025 сылга ордук болҕомтону Аҕа дойду улуу сэриитигэр Кыайыы 80 сылыгар аныахпыт. Быыстапкалар тэриллиэхтэрэ, ол иһигэр саамай сүрүн — Кыайыыга Саха сирин уонна олохтоохтор кылааттарын туһунан», — диэтэ Соловьев.
