Дьокуускайга куорат 2 № -дээх балыыһатыгар SMART-поликлиника үөрүүлээхтик арылынна. Гагарин уокуругар саҥа медицинскэй киин сменаҕа 600 киһи сылдьарыгар аналлаах. Аныгы поликлиника ыарыһахтары сэтинньи 25 күнүттэн көрөн барыаҕа, ЯСИА иһитиннэрэр.
Саҥа поликлиника аһыллыытыгар Саха сирин баһылыга Айсен Николаев кыттыыны ылла.
«Мин бүгүн куорат 2 № — дээх балыыһатын поликлиникатын үөрүүлээх аһыллыытыгар сылдьарбыттан олус үөрэбин. Балыыһа урут үлэлээбит усулуобуйата, биллэн турар, бүгүн доруобуйа харыстабылыгар баар стандартарга сөп түбэспэтэ. Өссө 2019 сылга Дьокуускай куорат сайдыытын чэрчитинэн поликлиника дьиэтэ хайаан да тутуллуо диэн быһаарыы ылыммытым. Бу биһиги өрөспүүбүлүкэбитигэр саамай улахан поликлиника. Кини саамай аныгы оборудованиенан хааччыллыбыт. Бу поликлиникаҕа сыһыарыллыахтаах 55 тыһыынча пациент диагностика уонна медицинскэй көмөнү оҥоруу хаачыстыбалара тупсарын бэйэлэригэр билиэхтэрэ диэн эрэнэбин», — диэн бэлиэтээтэ Саха сирин баһылыга Айсен Николаев.
Тоҕус тыһыынча квадратнай миэтэрэ иэннээх сиргэ дьахталлар консультациялара, күнүскү стационар, диагностическай уонна терапевтическай отделениелар, лучевой диагностика, чөлүгэр түһэрэр эмтээһин отделениелара, клиника-диагностическай лаборатория, суһал көмө уонна стоматология кабинеттара бааллар.
Поликлиника аныгы магнитнай-резонанснай уонна компьютернай томографтарынан, цифровой ультразвук диагностическай систиэмэлэринэн, ону тэҥэ эксперт кылаастаах рентген, эндоскопическай, маммографическай уонна флюорографическай оборудованиеларынан хааччыллыбыт.
SMART-поликлиника «ВИС» бөлөх Саха сирин бырабыыталыстыбатын кытта судаарыстыбаннай-чааһынай партнерство туһунан сөбүлэһиинэн бюджекка тастан киирэр үбүлээһининэн тутулунна.
“Биһиги бөлөхпүтүгэр бу Саха сиригэр тутар 13-с эбийиэкпит. Кинилэр бары үрдүк социальнай суолталаахтар: оскуолалар, садтар, культурнай киин. SMART-поликлиника саамай аныгы технологияларынан тутуллубут, госэкспертиза быһаарбыт нуорма болдьохторуттан хас да ый иннинэ үлэлэри түмүктээтибит. Саамай кылаабынайа — быраастар хаачыстыбалаах көмөнү оҥороллоругар саҥа таһымҥа таҕыстылар. Манна эксперт кылаастаах сүрүн медицинскэй оборудование 732 туруорулунна, олортон 70% -на Россияҕа оҥоһуллубут. Бу көрдөрүүнү дойдуга ыытыллар импорты уларытар бэлиитикэ көмөтүнэн ситистибит”, — диэн кэпсээтэ “ВИС” бөлөх дириэктэрдэрин сэбиэтин бэрэссэдээтэлэ Сергей Ромашов.
Кредитор уонна гарант оруолугар Газпромбанк буолла. Кини тутууну үбүлээһин 60-ча бырыһыанын кредит үбүнэн хааччыйда. Саҥа поликлиника тутуллуута өрөспүүбүлүкэ доруобуйа харыстабылын тиһигин сайыннарыыга уонна Россия президенэ Владимир Путин көҕүлээбит «Уһун уонна көхтөөх олох» национальнай бырайыак соруктарын быһаарыыга көмөлөһүөҕэ.
