Быһаарыыга олоҕуран, Өрөспүүбүлүкэ болуоссата диэн уопсастыбаннай сир ааттанна, Ленин проспегын илин өттө. 2024 сыллаахха Дьокуускай куорат маастар-былаанын чэрчитинэн манна уларытан тутуу оҥоһуллубута, национальнай истиили тутуһан, аныгы архитектурнай көстүүлэр туруоруллубуттара.
Дьүүллэһии кэмигэр этиллибитин курдук, Дьокуускай каартатыгар Ленин болуоссата миэстэтигэр хаалар. Проспект арҕаа өттүгэр сэбиэскэй судаарыстыба бастакы салайааччытын пааматынньыга саҥардылынна.
«Саха сирэ административнай киинигэр Өрөспүүбүлүкэ болуоссата баар буолара сөптөөх. Ситиһиитигэр, Россия социальнай-экономическай сайдыытыгар кылаатыгар, өрөспүүбүлүкэ норуотугар убаастабыл, махтал бэлиэтэ. Икки ыйынан Саха сирэ 103 сылын туолуо. Саха Өрөспүүбүлүкэтин күнүн көрсө үйэлээх историятыгар аан бастаан Өрөспүүбүлүкэ болуоссата баар буолуута дириҥ суолталаах», — диэтэ куорат дууматын бэрэссэдээтэлэ Альберт Семенов.
Өрөспүүбүлүкэ болуоссата баар буоларыгар Саха сирин убаастанар дьоно тыл эттилэр: тэрилтэ салайааччылара, уопсастыбанньыктар, историктар, култуура бэрэстэбиитэллэрэ. Этиини түөрт тыһыынчаттан тахса куорат олохтооҕо өйөөтө, анал сурукка бигэргэтэр илии баттаатылар.
