Дьокуускай түөрт оскуолатыгар саҥа үөрэх дьылыгар буфеттары аныгы кафеларга кубулутуохтара. «Саҥа киэптээх оскуола буфета» бырайыагы «ЦРО» МАУ аһылык оператора бэйэтин үбүнэн олоххо киллэрэр.
Балаҕан ыйын 1 күнүгэр Дьокуускай куорат лицейигэр, Н.А. Алексеева техническэй лицейигэр, оҕо айымньытын дыбарыаһыгар уонна саха-корей оскуолатыгар ураты дизайннаах тупсаҕай кафелар арыллыахтара.
«Хас биирдии оскуола бэйэтигэр эрэ анаммыт аныгы дизайннаах стильнэй интерьери туруорар. Оскуола оҕолоро манна аныгылыы кыраһыабай кафеҕа, тупсаҕай эйгэҕэ эбиэттээн, уруоктартан сынньанар миэстэлэрэ буолуоҕа. Саҥа миэбэл, тэрил атыылаһылынна. Үрдүк олоппостор баар буолуохтара. Ону таһынан оскуола кафелара повардар кулинарнай маастар-кылаастары ыытар былаһааккаларынан буолуохтара. Өрөмүөн үлэтэ бүтэн эрэр. Билигин талааннаах худуоһунньуктар истиэнэлэри илиинэн уруһуйдууллар», — диэн кэпсээтэ «ЦРО» МАУ дириэктэрэ Варвара Кычкина.
Маны сэргэ аһылык оператора саҥа үөрэх дьылыгар оскуола менютын саҥардар былааннаах. Олохтоох бородууксуйаҕа болҕомто ууруллуоҕа.
