Аны икки нэдиэлэнэн Дьокуускайга Орджоникидзе болуоссатыгар Саҥа дьыллааҕы харыйаны туруоруу саҕаланыаҕа. Бу туһунан «Горсвет» тэрилтэ салайааччыта Максим Машков алтынньы 27 күнүгэр куорат дьаһалтатын былаанныыр мунньаҕар иһитиннэрдэ.
Машков этэринэн, искусственнай маһы таҥар үлэҕэ сэтинньи 10 күнүгэр киириэхтэрэ.
Мэрияҕа эппиттэринэн, былырыын Орджоникидзе болуоссатын 20 миэтэрэлээх саҥа харыйа киэргэппитэ. Хотугу таба курдук оҥоһуллубута, тула ойуулар ситимнэспиттэрэ. Үрдүгэр — «Биэс харах» диэн саха харысхалын оһуора ууруллубута.
