Өрөспүүбүлүкэ киин куоратыгар уопсастыбаннай тырааныспар үлэтэ күһүҥҥү графикка көһүөҕэ. Маршрутнай оптуобустар ахсааннара 250 диэри элбиэҕэ, бу туһунан Дьокуускай куорат дьаһалтатын мунньаҕар иһитиннэрдилэр, СИА суруйар.
«Балаҕан ыйыгар куоракка эбии 19 саҥа оптуобуһу үлэҕэ таһаарыахтара», — диэн суол уонна тырааныспар сулууспатын салайааччыта Эдуард Садовников биллэрдэ.
Дьокуускай баһылыга Евгений Григорьев үөрэх дьыла саҕаланыан иннинэ оптуобустар хамсааһыннарын, графигы тутуһууларын, санитарнай туруктарын, валидатордары уонна видеорегистратордары үлэлэтиини күннээҕи хонтуруолга ылар тоҕоостооҕун бэлиэтээтэ.
