Дьокуускайга Саха сирин бастакы президенэ Михаил Николаев аатынан 40 №-дээх орто оскуола балаҕан ыйын 1 күнүгэр арыллар. Бэлэмнэнии үлэтэ түмүктэнэр. Өрөспүүбүлүкэҕэ саамай улахан үөрэх кыһата 17,2 тыһыынча кв.м иэннээх, 990 үөрэнээччигэ анаммыт.
Оскуола дириэктэрэ Галина Васильева суруналыыстарга иһитиннэрбитинэн, педагогическай кэлэктиип толору хааччыллыбыт: аҥара эдэр исписэлиис, аҥара уопуттаах учууталлар. Үөрэнээччилэри ылыы түмүктэннэ, 930 оҕо. Быйыл 11-с кылааска оҕо ылыллыбат. «Биһиги бырааһынньыкка көхтөөхтүк бэлэмнэнэбит. Күн аайы манна субуотунньуктар, төрөппүттэр мунньахтара ыытыллаллар. Бүгүҥҥүттэн репетициялар саҕаланнылар. Арыйыыны долгуйа күүтэбит», – диэн дириэктэр бэлиэтээтэ.
Оскуола профиль иннинээҕи уонна профильнай кылаастары тэрийдэ, онно математическай, медицинскэй, педагогическай, инженернэй, естественнэй-научнай хайысхалар бааллар. Үөрэнээччилэр этиилэрэ учуоттанна. Үөрэтии тус-туспа кылаастарга нууччалыы уонна сахалыы тылларынан ыытыллыаҕа.
Оскуола РФ президенэ Владимир Путин көҕүлээбит «Үөрэхтээһин» национальнай бырайыагынан тутуллубут. «Бу оскуола национальнай бырайыагы олоххо киллэрии суотугар тутулунна. Уопсайынан, Саха сиригэр национальнай бырайыактары олоххо киллэрии саҕаланыаҕыттан 60-тан тахса эбийиэк тутулунна», — диэн регион үөрэҕин уонна наукатын миниистирин солбуйааччы Степан Степанов бэлиэтээтэ. Иван Кульбертинов уулусса, 1а аадырыһыгар турар 40 №-дээх оскуола аһыллыыта чугастааҕы үөрэх кыһаларыгар ноҕуруусканы чэпчэтиэ, оҕолор дьиэлэриттэн чугас үөрэнэллэригэр кыах биэриэ диэн кини эбэн эттэ. Үөрэх биир сменаҕа тэриллиэҕэ. Үөрэххэ киириигэ ордук болҕомто пропискалаах оҕолорго, ону тэҥэ СВО кыттыылаахтарын уонна күүс структураларын үлэһиттэрин оҕолоругар уурулунна.
Саҥа оскуола «Воин» ыччаты байыаннай-спортивнай бэлэмнээһин уонна патриотическай иитии киинин баазата буолуоҕа. «14 саастарыттан биһиэхэ байыаннай дьыалаҕа үөрэниэхтэрэ. Биһиги инструктордарбыт анал байыаннай дьайыы кыттыылаахтара», – диэн дириэктэр Галина Васильева чуолкайдаата. Оскуола үлэтин сүрүн хайысхаларынан патриотическай, спортивнай, үлэ уонна научнай буолаллар.
Напомним, имя первого президента Якутии Михаила Николаева крупнейшей школе Якутии присвоили в ноябре 2024 года.
Санатан эттэххэ, Саха сирин бастакы президенэ Михаил Николаев аата 2024 сыл сэтинньитигэр иҥэриллибитэ.
