Тохсунньу 12 күнүгэр Дьокуускайга академик В.П. Ларионов аатынан «Инникигэ хардыы» / «Шаг в будущее» эдэр чинчийээччилэр XXX үбүлүөйдээх научнай кэмпириэнсийэ-куонкурустара үлэтин саҕалаата. Бу өрөспүүбүлүкэ үөрэнээччилэрин научнай-чинчийэр түмсүүлэригэр сүрүн тэрээһин буолар, үс күн устата бары муниципальнай оройуоннартан 1500-тэн тахса 5-11 кылаас үөрэнээччилэрэ түмүстүлэр.
1996 сылтан ыытыллар кэмпириэнсийэ кэскиллээх учуонайдарга уонна инженердарга саҕалааһын былаһааккатынан ааҕыллар уонна быйыл 30-с төгүлүн ыытыллар. Научнай кэмпириэнсийэҕэ Россияҕа уонна Саха сиригэр наука уонна техника сайдыытыгар кылаатын киллэрбит уһулуччулаах учуонай, науканы тарҕатааччы уонна оскуола оҕолорун уонна ыччат чинчийэр үлэлэрин тэрийээччи, Россия наукаларын академиятын дьиҥнээх чилиэнэ, техническэй наука доктора, Саха сирин, Мэҥэ Хаҥалас улууһун уонна Дьокуускай бочуоттаах гражданина Владимир Петрович Ларионов аата иҥэриллибитэ.
Эдэр чинчийээччилэр үлэлэрин 13 секцияҕа билиһиннэрэллэр — математика, физика уонна цифровой технология курдук чопчу наукалартан саҕалаан, гуманитарнай хайысхаларга: историяҕа, филологияҕа, культураҕа уонна искусствоҕа. Хас биирдии бырайыак — оскуола оҕото уонна кини научнай салайааччыта сыралаах үлэтин түмүгэ.
Кэмпириэнсийэ суолтатын РФ үөрэҕириитин министиэристибэтин дьаһалларын официальнай испииһэгэр киллэрии бэлиэтиир. Ол аата лауреаттар, дипломаннар өрөспүүбүлүкэ таһымыгар билинии таһынан, Россия үрдүк таһымнаах куонкурустарыгар кыттарга суолу арыйаллар. Маннык тэрээһиннэргэ кыайыы дойду тутаах үрдүк үөрэх кыһаларыгар киириигэ учуоттанар тус ситиһиилэр баалларыгар ааҕыллар. Былырыын уһулуччулаах дьоҕурдарын көрдөрбүт оҕолор судаарыстыбаннай реестрдэригэр бу кэмпириэнсийэ 1247 кыттыылааҕа – Саха сирин оҕолорун дааннайдара киллэриллибиттэрэ.
«Инникигэ хардыы» биир чаҕылхай үгэһинэн быйыл саҥа таһымҥа тахсар «Общественнай талыы» куонкурус буолар. Бүгүн, тохсунньу 12 күнүгэр, бүтүн өрөспүүбүлүкэ олохтоохторо «ВКонтакте» социальнай ситимҥэ Саха сирин наукаларын Кыра академиятын официальнай сирэйигэр онлайн куоластааһыҥҥа кыттыыны ылан, түмүккэ быһаччы дьайыахтарын сөп. Маны таһынан корпоративнай партнердар, олор истэригэр “Алмазы Анабара”, «Якутскэнерго», Технопарк «Якутия» уо.д. а. Бастыҥ үлэлэри талыыга бэйэлэрин экспердиир сэбиттэрин үлэлэтэллэр.
Үбүлүөйдээх сыл уратытынан карьера инники кэскилигэр практическай туһаайыы буолуоҕа. РНА СО Саха сиринээҕи научнай киинин институттара кыттар оҕолорго тус-туспа консультациялары ыытыахтара, бырайыактары ситэрэн, дьиҥнээх наукаҕа бэйэлэрин идеяларын сайыннарыы кэскилин көрөргө көмөлөһүөхтэрэ.
Научнай конференция хас биирдии кыттааччытын ситиһиитигэр учуутал үлэтэ турар. Онон научнай салайааччыларга уонна учууталларга аналлаах дьыалабыай бырагыраама быйыл оскуола научнай кулууптарын тэрийиигэ уонна сайыннарыыга ананыаҕа. М.К. Аммосов аатынан ХИФУ, Саха сирин наукаларын Кыра академиятын уонна С. Н.Донской-II аатынан үөрэх сайдыытын уонна квалификацияны үрдэтии институтун өйөбүллэринэн наставниктар компетенцияларын үрдэтиигэ туһуламмыт идэни үрдэтэр куурустар, бырайыактыыр конвейер уонна төгүрүк остуоллар буолаллар.
Кыттааччылар үлэлэрин 300-тэн тахса эксперт — Хотугулуу-Илиҥҥи федеральнай университет, Арктическай ГАТУ, РНА СО Саха сиринээҕи научнай киин институттарын тутаах учуонайдара, «Якутия» Технопарк, Саха сирин сайдыытын Корпорация исписэлиистэрэ уо.д. а. Сыаналыахтара. Бу үөрэнээччи уонна үлэлии сылдьар учуонай икки ардыгар ураты кэпсэтии – кэмпириэнсийэ биир саамай суолталаах чааһа буолуоҕа.
Сүрүн тэрийээччинэн өрөспүүбүлүкэ наукаларын Кыра академиятынан сирэйдэнэн Саха сиринээҕи үөрэх уонна наука министиэристибэтэ буолар. Тэҥинэн тэрийээччинэн М.К. Аммосов аатынан Хотугулуу-Илиҥҥи федеральнай университет буолар. Тэрээһин регион научнай, үөрэх институтун бары өттүнэн өйөбүлүнэн ыытыллар.
