Пуорум кыттааччытын ахсаана 150 куоһарар, спикердарынан 250 киһи үлэлиир. Питчинг-сессияларга бырайыактары көрдөрүөхтэрэ, Уһук Илин регионнарын сайдыыларыгар туһаайыллыбыт уонна олох хаачыстыбатын тупсарыыга анаммыт. Бырагыраамаҕа Уһук Илиҥҥи киинэлэри көрдөрүү, аныгы култуура бэстибээлэ, гастробэстибээл, кэнсиэртэр уонна воркшоптар бааллар.
Уһук Илини уонна Арктиканы сайыннарыы миниистирин солбуйааччыта Эльвира Нургалиева Уһук Илин култууратын кыаҕын болҕомтоҕо хатаата. «Манна 150 норуот, ол иһигэр 30 – аҕыйах ахсааннаах төрүт норуоттар. Бу дириҥ култуура, үгэстэр, гастрономия – креативнай экономика сүдү тирэҕэ», — диэтэ Эльвира Нургалиева.
Бырабыыталыстыба бэрэссэдээтэлэ Кирилл Бычков креативнай индустрия экономикаҕа саҥа кирбии буоларын эттэ. «Көҕүлээһин Уһук Илини таһынан, бүтүн Россиятааҕы буолар. Рекорду олохтообут элбэх кыттааччыга үөрэбит: бүгүн биһигини кытта РФ 39 субъега баар, Россия аҥарын кэриэтэ. Биһиги сыалбыт — креативнай кластердар хас биирдии региоҥҥа баар буолуулара, айар уонна оҥорор кыаҕы биэриилэрэ», — диэтэ Кирилл Бычков.
Пуорум арыллыытыгар театрализованнай көрдөрүү уонна AY YOLA башкирскай фолк-бөлөх толоруута буолла.
