Ахсынньы 11 күнүгэр Дьокуускайга Саха сирин уһулуччулаах судаарыстыбаннай, политическай уонна общественнай деятелэ Гавриил Иосифович Чиряев 100 сылыгар аналлаах «Идэҕэ хардыы» эдэр чинчийээччилэр XIX форумнара ыытыллыаҕа. Бу туһунан өрөспүүбүлүкэ профессиональнай үөрэхтээһини сайыннарыы институтун редакционнай-издательскай киинэ иһитиннэрэр.
Тэрээһин Дьокуускайдааҕы Т. Г.Десяткин аатынан промышленнай техникум базатыгар ыытыллыаҕа уонна талааннаах оҕолор уонна ыччат чинчийэр уонна бырайыактыыр үлэлэрин сайыннарарга былаһаакка буолар.
Форум чэрчитинэн араас тэрээһиннэр былааннаннылар:
Өрөспүүбүлүкэтээҕи «Бизнес-идея марафона» бизнес-бырайыактар куонкурустара;
Өрөспүүбүлүкэтээҕи интернет-олимпиада;
«Эдэр маастар» медиа-конкурс;
Өрөспүүбүлүкэтээҕи “Харысхал лидера. Устудьуоннар лигалара»;
«Харысхал лидера-2025» бырайыактыыр көҕүлээһиннэр куонкурустара.
Форум сүрүн тэрээһининэн экономика уонна социальнай эйгэ тутаах салааларын хабар 13 тиэмэнэн ыытыллар научнай-практическай кэмпириэнсийэ буолар: “Хайа салаата”, “Информационнай уонна коммуникационнай технологиялар”, “Тутуу”, “Тырааныспар” уо.д. а.
Сайабылыанньа хампаанньатын түмүгүнэн конференция сүүмэрдиир былаһааккатыгар 45 үөрэх тэрилтэтиттэн 486, ол иһигэр Саха сириттэн 43, Москваттан 2 үлэ киирдэ.
Саамай элбэх сайабылыанньаны ыыппыттар:
И. И. Фадеев аатынан Үп-экэниэмикэ колледжа;
Н. Г. Чернышевскай аатынан Бүлүүтээҕи профессиональнай-педагогическай колледж;
В. А. Вонгродскай аатынан Дьокуускайдааҕы медицинскэй колледж;
Т. Г. Десяткин аатынан Дьокуускайдааҕы промышленнай техникум.;
Ю. А. Готовцев аатынан Дьокуускайдааҕы сервис технологическай техникума;
«Айар уустар» креативнай индустрия колледжа;
«Айтыын» цифровой технология колледжа;
С. Ф. Гоголев аатынан Дьокуускайдааҕы педагогическай колледж;
М.Н. Донской аатынан өрөспүүбүлүкэтээҕи инбэлииттэри профессиональнай уонна медицинскэй-социальнай реабилитациялыыр техникум-интернат.
Сэтинньи 25 күнүгэр диэри форум экспертнэй көрүүтэ бүтэһик түһүмэххэ кыттар бастыҥ үлэлэри сүүмэрдээһини ыытыаҕа.
