Дьокуускайга «Буойун» киин курсааннарын ортолоругар «Буойун Суола» бастакы бүтүн Россиятааҕы байыаннай-тактическай күрэхтэһии аһыллыытын сиэрэ-туома буолла. Балаҕан ыйын 15-21 күннэригэр ыытыллар финальнай түһүмэххэ Россия түөрт регионуттан — Саха Сириттэн, Хабаровскай кыраайтан, Волгоград уонна Тюмень уобаластарыттан саамай күүстээх хамаандалар муһуннулар.
Күрэхтэһии РФ бырабыыталыстыбатын бэрэссэдээтэлин солбуйааччы – президент Уһук Илиҥҥэ боломуочуйалаах бэрэстэбиитэлэ, «Воин» киин кэтээн көрөр сэбиэтин бэрэссэдээтэлэ Юрий Трутнев сорудаҕынан ыытыллар.
Саха сирин баһылыга Айсен Николаев кыттааччылары эҕэрдэлээтэ, өрөспүүбүлүкэҕэ турнир ыытыллыыта символическай буоларын бэлиэтээтэ. «Мин ис сүрэхпиттэн үөрэбин, биһиэхэ, Саха сиригэр, бу күрэхтэһиилэри ыытарга итэҕэйбиттэрэ улахан чиэс, үөрүү, киэн туттуу. Саха сиригэр эр санаалаах дьон, Ийэ Дойдуну көмүскээччилэр үгэстэрэ мэлдьи албан. Биһиги айылҕабыт, бэйэтэ олус кытаанах эрээри үтүө, күүстээх дьону таптыыр. Ытык Чочур-Мыраан томтордорун үктэлигэр ыытыллар күрэхтэһиилэр күүскүтүгэр күүс эптин», — диэн финалистарга регион баһылыга туһаайан эттэ.
Айсен Николаев саха дьоно Аҕа дойдуну көмүскүүргэ, Аҕа Дойду Улуу сэриитин сылларыгар да, бүгүн да — анал байыаннай дьайыыга кылааттарын санатта. Саха сирин баһылыга өрөспүүбүлүкэттэн тахсыбыт 12 Россия Геройун ахтан ааста, сорохторо «Буойун суола» финал аһыллыытын сиэригэр-туомугар кыттыыны ыллылар.
«Өрөспүүбүлүкэ сиригэр-уотугар финалы ыытар субъегынан талыллыбыта. < … > Бу биир интэриэһинэй, ураты оонньуу, тоҕо диэтэххэ, кини бырагыраамата физическэй бэлэмнээһиҥҥэ да, байыаннай да өттүнэн күрэхтэһэр састааптаах», — диэтэ Саха сирин вице-премьерэ Ольга Балабкина.
«Биһиги финалистарбыт бары сүүмэрдиир түһүмэхтэргэ үрдүк көрдөрүүлээхтэр. Бүтэһик түһүмэх кэмигэр букатын атын, саҥа тургутуулары ааһыахтааххыт. Күрэхтэһиибит девиһэ этэринэн: «Үөрэххэ ыарахан — киирсиигэ чэпчэки». Эһиги бары «Буойун» киин үөрэх бырагырааматынан үөрэммиккит, онон бу тургутуулары эмиэ «туйгуннук» ааһыаххыт диэн эрэллээхпин», — диэн кыттааччыларга «Буойун» киин дириэктэрэ Дмитрий Шевченко сүбэ-соргу эттэ.
«Буойун» киин хамандыыра, Арассыыйа Геройа Андраник Гаспарян курсааннар сайдыыларыгар күрэхтэһии суолтатын тоһоҕолоон бэлиэтээтэ: «Билигин манна турар финалга тахсыбыт хамаандалар сүүмэрдиир түһүмэхтэргэ бэйэҕитин тулуурдааххытын, дьулуурдааххытын дакаастаатыгыт. Хас биирдии хамаанда толору бырагырааманан үлэлиэ, субъегын интэриэһин туруулаһыа диэн эрэллээхпин».
Бүтэһик тургутуу кээмэйэ сүүмэрдиир түһүмэхтэртэн лаппа уратылаах. Хамаандалар Дьокуускай таһыгар 25 кв.км иэннээх киэҥ сиргэ үлэлиэхтээхтэр. «Бу разведка дивизионун бөлөҕүн толору үлэтэ. Манна тулуур, спортивнай кыах эрэ буолбакка, өй, сатабыл, тактика эмиэ суолталаах. Бастатан туран, бу хаачыстыбалары ким баһылаабыт ол кыайыаҕа», — диэн бэлиэтээтэ Саха сирин ыччат дьыалатыгар уонна социальнай коммуникацияҕа миниистирэ Петр Шамаев.
Сиһилии манна аах.
