Куорат Дууматын үөрэхтээһиҥҥэ, култуураҕа уонна оҕо аймах дьыалаларыгар кэмитиэтигэр оҕо сайыҥҥы сынньалаҥын тэрийии боппуруоһа көрүлүннэ, суруйда Саха парламент саайт.
«Дьокуускай куорат» куораттааҕы уокурук дьаһалтатын үөрэҕин управлениетын начаалынньыга Мария Петрова иһитиннэрбитинэн, оҕо сайыҥҥы сынньалаҥын, чэбдигириитин тэрийиигэ өрөспүүбүлүкэ уонна муниципалитет бүддьүөттэриттэн 47 мөл солк көрүллүбүт. Оҕо сайыҥҥы сынньалаҥын, чэбдигириитин тэрийии кэрискэтигэр киирбит 64 тэрилтэҕэ 8205 оҕо хабыллыахтаах. Бу иһигэр күнүскү лааҕырдар, үлэ уонна сынньалаҥ лааҕырдара уонна куорат таһынааҕы чэбдигирдэр тэрилтэлэр бааллар.
Ордук болҕомто чэпчэтиинэн туһанар араҥаҕа киирэр оҕолорго, ол иһигэр Анал байыаннай дьайыы кыттыылаахтарын оҕолоругар, элбэх оҕолоох уонна дьоҕус дохуоттаах ыаллар оҕолоругар, инбэлииттэргэ уонна доруобуйаларыгар хааччахтаах оҕолорго ууруллар. Кинилэргэ босхо итиэннэ чэпчэтиилээх путёвкалар көрүллэллэр. «Старт возможностей» бырайыак чэрчитинэн, доруобуйаларыгар хааччахтаах оҕолорго инклюзивной сенсорнай былаһааккалар тэриллэллэр. Ону таһынан, 14-16 саастаах оҕолору быстах үлэлэн хааччыйыыга былырыын сайын 2 тыһыынча кэриҥэ оҕо хабыллыбыта, быйыл ити кирбиини намтаппат сорук турар.
«Үөрэхтээһини сайыннарыы» федеральнай бырайыак чэрчитинэн, «Спутник» лааҕырга түөрт хапытаалынайа суох эбийиэк тутуллубут. Онуоха федеральнай, өрөспүүбүлүкэ уонна муниципалитет бүддьүөттэриттэн 197 мөл. солк харчы көрүллүбүт. Куорат дьаһалтата лааҕыр ис-тас өттүн, тиэргэнин тупсаран оҥорууга 24 мөл солк эбии тыырбыт. Лааҕыр салалтата уонна үөрэх управлениета ирдэнэр сэрэтэр дьаһаллары ыыппыттар: электроуот ситимин уонна баһаартан сэрэхтээх буолуу тэриллэрин бэрэбиэркэлээбиттэр.
Мунньах түмүгэр дьокутааттар куораттааҕы уокурук дьаһалтатыгар куорат таһыгар саҥа лааҕыры тутарга сир учаастагын тыырыы боппуруоһун көрөргө эттилэр. Ону таһынан, лааҕырдарынан сылдьан, оҕо сынньанар, дьарыктанар, аһыыр усулуобуйатын итиэннэ куттал суох буолуутун хааччыйыы хайдах тэриллибитин билсэргэ быһаардылар диэн куорат Дууматын пресс-киинэ иһитиннэрэр.
