Отельга араас категориялаах 148 нүөмэр баар буолуоҕа, ол иһигэр, 5 нүөмэр доруобуйаларыгар хааччахтаах, кыаммат дьоҥҥо аналлаах. Биир күҥҥэ 300 киһи тэҥинэн түһэр кыахтаах. Маны тэҥэ, конференц-саала, эрэстэрээн, дьыалабыай хос, тренажернай комплекс баар буолуохтара.
— Дьокуускайга тутуллар гостиничнай комплекс бырайыага ураты тутуллаах. Үөһэттэн көрдөххө, үс муннуктуу быһыылаах, киин өттүгэр 13 этээстээх, төгүрүктүү башнялаах. Онон түннүктэрэ бары кэриэтэ Өлүөнэ өрүс диэки тахсаллар. Түннүктэр панорамнай буолан, кыһыннары-сайыннары кэрэ көстүү арыллар, — диэн судаарыстыбаннай эспэртиисэ эспиэрэ Оксана Пономарева бэлиэтээтэ.
Бырайыак «Туризм и гостеприимство» национальнай бырайыак чэрчитинэн тутуллар. Гостиницаны «Центр» ХЭТ тутар, бу тэрилтэни тэрийээччилэр — «Туризм.РФ» коорпорация, Cosmos Hotel Group, УК «Центр» («РИК» бөлөх).
— Саха сиригэр үрдүк таһымнаах гостиница аҕыйах, маны тэҥэ, кэрэ айылҕалаах, ураты килиимэттээх буолан, Арассыыйаттан элбэх турист интэриэһиргиир буолла. Ирбэт тоҥҥо турар соҕотох куорат буолар. Онон туризм күүскэ сайдар кыахтаах, — Судаарыстыбаннай эспэртиисэ управлениетын сулууспатын салайааччытын солбуйааччы Татьяна Малашина кэпсээтэ.
