Дьокуускайдааҕы гериатрия киинигэр компьютернай томография үлэлээтэ. Наадалаах аппараты Ил Дархан Айсен Николаев көмөтүнэн балтараа ый иһигэр туруордулар.
«Биһиги Кирова, 34-гэр баар поликлиникаҕа сыһыарыылаах буолан, эрдэ онно эрэ КТ-га түһэр кыахтаах этибит. Ыарыһахтарбыт үксэ кырдьаҕас буоланнар илдьэргэ үгүс ыарахаттары көрсөрбүт», — диир өрөспүүбүлүкэтээҕи 3№-дээх клиническэй балыыһа лучевой диагностикаҕа сэбиэдиссэйэ Наталья Слепцова.
Маныаха эбии ааспыт сайын от ыйыттан киин инфекционнай стационарга кубулуйан, коронавирустаабыт ыарыһахтар эмтэммиттэр. Ирдэбил быһыытынан кинилэри сотору, сотору КТ-га түһэриэххэ наадата үөскээбит. Ол кыһалҕатыттан олохтоох бэтэрээннэр уонна Кииҥҥэ сыһыарыылаах нэһилиэнньэ Ил Дархаҥҥа этиммиттэр.
«Балтараа ый иһигэр компьютернай томограф турар хоһун бэлэмнээтибит. Билигин аппарат тургутуу быһыытынан үлэлиир», — диэтэ Наталья Слепцова.
