Саха сирин баһылыга Айсен Николаев этиитинэн Дьокуускайдааҕы аан дойду сэлии киинин (ВЦМ) концепцията толору саҥардылынна. Билигин бырайыак научнай хайысханы эрэ буолбакка, туристическай хайысханы эмиэ киллэрэр. Бу туһунан өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрэр.
Киини сайыннарыы саҥа логиката науканы, үөрэҕи, культураны, туризмы, экологияны, экономиканы уонна идэни холбоон бүтүн ситими тэрийэр сыаллаах. Норуоттар икки ардыларынааҕы научнай-культурнай комплекс Дьокуускай маастар-былаанын олоххо киллэриигэ баар. Бырайыагы РФ президенэ Владимир Путин бигэргэппитэ.
«Бу киин музей эрэ буолбакка, научнай институт быһыытынан эрэ буолбакка, туристскай сүүрээн быһыытынан дьиҥнээхтик Дьокуускай куорат Россияҕа эрэ буолбакка, аан дойдуга биллэн-көстөн тахсыан баҕарабыт. < … > Аан дойдуга биир да регион маннык ахсааннаах сэлии фауналааҕынан биллэр кыаҕа суох — булумньу 90% биһиги өрөспүүбүлүкэбитигэр оҥоһуллубут. < … > Саха сирэ аан дойду далааһыныгар булгуччу лидер буолуохтаах. Маныаха өйдөнөр, амбициознай концепция баар буолуохтаах», — диэтэ Айсен Николаев.
Саха сирин баһылыга бизнес, федеральнай структуралар уонна сайдыы институттара өйөбүллэринэн аан дойдутааҕы сэлии киинин аны чугастааҕы уонча сылга тэрийиэххэ сөп диэн эрэллээҕин биллэрдэ. Айсен Николаев кииҥҥэ кадрдары бэлэмнээһин барыахтааҕын бэлиэтээтэ.
ВЦМ тэриллэр былаһаакката Өлүөнэ муостатын аттыгар Дьокуускайга киириигэ Табаҕатааҕы тумус буолуоҕа. Манна научнай, культурнай уонна туристическай инфраструктуралар холбоһуохтара.
