Уһук Илиҥҥэ гектар сири биэриини сүрүннүүр сокуон алтынньы 1 күнүттэн саҕаланар иккис түһүмэҕэр анаммыт мунньах буолан ааста.
Сир сыһыаннаһыыларын агенствотын салайааччыта Анастасия Новоселова этэринэн, бу чэрчитинэн бэриллэр сирдэр Дьокуускай куораттан 20 км тэйиччи бааллар.
«Росреестр дааннайдарынан, куорат уокуругун сирэ-уота 343 тыһ. 141 гектарга тэҥнэһэр. Итинтэн 10% Уһук Илиҥҥэ сири биэрии сокуонугар сөп түбэһэр. Сир учаастагын баһыйар үксэ ойуур фондатыгар киирсэр. Онон сайаапкалары Саха сиринээҕи ойуур сыһыаннаһыыларыгар департамена көрүөҕэ. Сир агенствота уонна сир, баай-дуол сыһыаннаһыыларын сүрүннүүр департамен тыа хаһаайыстыбатын уонна ураты харыстанар сирдэри сокуон дьайыытыттан таһаарбыттара», — диир Анастасия Новоселова.
Алтынньы 1 күнүттэн ыла өрөспүүбүлүкэ сиригэр-уотугар биир гектар сири ылар туһугар сайабылыанньалары Саха сиригэр регистрациялаах эрэ дьон биэрэллэр. 2017 сыл олунньу 1 күнүттэн маннык быраап Арассыыйа гражданнарыгар барыларыгар бэриллэр.
«Өскөтүн киһи электроннай өҥө саайтыгар регистрацияламмыт буоллаҕына, сайаапканы электроннай ньыманан биэрэр кыахтаах. Итиниэхэ федеральнай информационнай систиэмэҕэ (ФИС) киирэн бэлиэтэнэр наадалаах. Боломуочуйалаах уоргаҥҥа быһа тахсыахха сөп. Дьокуускайга маннык уорганынан баай-дуол уонна сир сыһыаннаһыыларын департамена буолар», —диэтэ Новоселова.
